Общество

Ыччаттары култуура управлениетын начаалынньыга Мария Мартынова эҕэрдэлээтэ, чаһы бэлэхтээх улуус баһылыгын Бочуоттаах грамоталарын суруналыыстыка эйгэтигэр ситиһиилээх Эльдар Садовниковка, успуорка бастыҥ көрдөрүүлээх Арина Старостинаҕа, Милана  Громоваҕа туттарда. «Стройкон» тэрилтэ салайааччыта, Арассыыйа үтүөлээх тутааччыта Иван Полушкин үс устудьуоҥҥа: Эльдар Садовниковка, Дьулустаан Борисовка, Степан Шелкановка анал бэлэхтэрин туттарда.

Абыйтан төрүттээх, Дьокуускайга олорор, үлэлиир ыччаттар: социальнай ситимнэргэ 51 тыһыынча сурутааччылаах Евгений Слепцов (Уолбут), сахалыы саҥарарга үөрэнэ сылдьар Анастасия Спиридонова (Белай Гора), ырыаһыт, «Үрдэл» бириэмийэ лауреата Иннокентий Черемкин (Абый), аҕыс киинэҕэ уһуллубут Дьулустаан Корнилов (Кэбэргэнэ), ыспарсымыан, Павел Пинигин туһунан «Триумф» киинэ сүрүн дьоруойа Степан Щелканов (Сутуруоха) кэлбиттэрэ көрсүһүү ис хоһоонун байытта. Кинилэр эдэр биир дойдулаахтарыгар хас биирдии киһи бэйэтин кыаҕын арыйыан, билиини ылыан, уһуйааччылары уонна биир санаалаахтары булуон сөбүн эттилэр,  ыарахаттартан чаҕыйбакка туруоруммут соругу ситиһэр туһугар элбэҕи сүбэлээтилэр-амалаатылар.

Анастасия Спиридонова блогун саҕалыырыгар хейтердар саба түспүттэрин: «Саха эрээригин нууччатыйымсыйыма», – дэспиттэрин аҕынна. Кыра сылдьан сыанаҕа тахсарыгар олус кыбыстарын, онтон сыыйа  босхоломмутун, психологтары кытары үлэлээбитин кэпсээтэ. Иннокентий Черемкин ырыа алыбыгар оҕо сааһыттан ылларбыт, араас куонкурустарга кыттан бэйэтин тургуппут. Бастаан сыанаҕа тахсарыгар эмиэ олус саллар, онтон сылтаан тохтоон да хаалыан баҕарар эбит, ол эрээри, санаатын бөҕөргөтөн, күүскэ дьарыктаммыт. Билигин көрөөччү иһирэхтик ылынарыттан, ытыһын таһынарыттан кынаттанар буолбут.      

Саҥа саҕалаан эрэр артыыс Степан Шелканов киинэҕэ уһуллуу олус долгутуулаах, ыарахан үлэ буоларын, успуордунан дьарыктанардааҕар элбэх сыраны эрэйэрин эттэ. «Биир каадыры устаары алта дубль оҥорон турардаахпыт. Аны ангылычаанныы саҥарар каадыр баар, онно олус  ыарырҕаппытым», -- диэн санаатын үллэһиннэ.

Дьулустан Корнилов номнуо аҕыс киинэҕэ уһуллан, дьоҥҥо-сэргэҕэ биллэр буолан эрэр. «Айхал» диэн киинэҕэ уһуллан баран, биир маннык  түгэҥҥэ түбэспитин туһунан аҕынна: «Киинэбит улахан экрааҥҥа тахсыбытын кэннэ, «Туймаада» эргиэн киинигэр пицца амсайыам диэн киирэ сырыттым. Онно арай, киһи бөҕөтө эргиллэ-эргиллэ көрөр, онтон аны хаартыскаҕа түсүһэн бардылар, сорохтор автограф көрдүүллэр. Манныкка саҥа түбэспит буоламмын, чаҕыйа санаабытым. Билигин дьон көрдөҕүнэ, улаханнык аахайбаппын, астынар да буолан эрэбин», -- диэн күлэ-күлэ кэпсээтэ.

Блогер Евгений Слепцов «Мужчина – мальчик» блокка идэтийиэн иннинэ  араас салааҕа холоммут. Бастаан гаас-ньиэп эйгэтигэр анал орто үөрэҕи бүтэрэн, салгыы үрдүккэ үөрэнэ сылдьыбыт эрээри, онно санаата сыппатах. «Миэхэ дьону кытары үлэлиирим ордук чугас эбит. Кылгас кээмэйдээх көрүдьүөс киинэлэри, сюжеттары устарбын сөбүлүүбүн», -- диэтэ. Оҕолор кинилэр кэпсииллэрин болҕойон иһиттилэр, араас ыйытыылары биэрдилэр.  

Истиҥ көрсүһүүнү устудьуоннар Айтурҕан Ашырахманова, Владимир Сорокоумов бэртээхэй ырыаларынан киэргэттилэр.

«Блогеры кытары бастыҥ каадыр» куонкурус, «Абый улууһун төһө билэҕиний?» таайбараҥ ыытылынна. Минньигэс астаах остуол тардылынна.

Галина МАТВЕЕВА

Хаартыска: ааптар түһэриитэ.