«Идэтинэн бастыҥ» Бүтүн Арассыыйатааҕы куонкурус 2012 сылтан ыытыллар. Былырыын дойдубут Бэрэсидьиэнин сорудаҕынан киэҥ далааһыннаахтык саҥардыллан, «Каадырдар» национальнай бырайыак сүрүн тэрээһинэ буолар.
Манна быйыл тыа хаһаайыстыбатын салаатыгар үс көрүҥҥэ бастыҥнар киирсиэхтэрэ. Ол курдук, «Бастыҥ агроном», «Бастыҥ механизатор» күрэхтэһиилэр. Уонна быйыл аан бастакытын «Бэтэринээр биэлсэр» номинация киирбит. Онон манна өрөспүүбүлүкэбит араас муннугуттан сэттэ кыттааччы сүүмэрдээһини ааһан икки күн устата күөн көрсүөхтэрэ.
Куонкурус үөрүүлээх аһыллыытыгар Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Светлана Горюшинская иһитиннэрбитинэн, эрэгийиэҥҥэ ыытыллар түһүмэхтэр суолталара олус улахан. Манна идэлэригэр бастыҥтан бастыҥнар күрэстэһэллэр. Быйыл уопсайа 8 номинацияҕа кыттыахтара. Күрэхтэһии түмүк Арассыыйатааҕы түһүмэҕэ Мордовияҕа от ыйын 1 – 10 күннэригэр ыытыллыа. Кини санаппытынан, былырыын «Интернациональнай» рудниктан хайа үлэһитэ Александр Тин-Шан «Идэтинэн бастыҥ» Бүтүн Арассыыйатааҕы куонкуруска «Иккис старт» номинацияҕа кыайыылаах буолбута.
Тыа хаһаайыстыбатын уонна аска-үөлгэ бэлиитикэ миниистирин солбуйааччы Сахайаана Павлова кэпсээбитинэн, 2030 сылга диэри тыа хаһаайыстыбатын сүрүн көрдөрүүлэрин 1,5 төгүл улаатыннарарга Ил Дархан сорудахтаан турар.
Кини иһитиннэрбитинэн, Сахабыт Сиригэр бэтэринээрдэри бэлэмнээһиҥҥэ быйыл үөрэх тэрилтэлэригэр 215 миэстэ көрүллүбүт. Быйылгыттан улуустарга үлэлии барар эдэр исписэлиистэргэ «Земскэй быраас» бырагыраама курдук 2 мөл. солкуобайдаах биир кэмнээх төлөбүр бэриллиэ. Оттон Аартыка улуустарыгар барааччыларга - 2,5 мөл. солкуобай. Маныаха быйыл 10 кубуота көрүллүбүт.
Күрэхтэһии туһунан уонна кыттааччылары кытары кэпсэтиилэри хаһыат аныгыскы нүөмэригэр ааҕыҥ.
Ааптар хаартыскаҕа түһэриитэ.
-
1
-
0
-
0
-
0
-
0
-
0
