Бырагырааманы арыйыыга Саха Өрөспүүбүлүкэтин урбааҥҥа, эргиэҥҥэ уонна туризмҥа миниистирэ Георгий Андреев кини суолтатын тоһоҕолоон бэлиэтээтэ.
«„Үрүҥ көмүс саҕалааһын|14“ диэн бырагыраама — бу көннөрү үөрэнии буолбатах, бу аҕам саастаах көлүөнэҕэ талааннарын уонна идиэйэлэрин олоххо киллэрэр дьиҥнээх кыах. Биһиги улахан интэриэһи көрдүбүт: 100-тэн тахса киһи сайаапка биэрбит. Бу биһиэхэ талааннаах, көхтөөх, бэйэ дьыалатын тэринэн эрэгийиэн экэниэмикэтигэр кылааттарын киллэрэргэ бэлэм дьон элбэҕин туоһулуур», — диэн кини бэлиэтээтэ.
Уопсайа бырагыраамаҕа кыттарга өрөспүүбүлүкэ араас улуустарыттан уонна Дьокуускай куораттан 117 сайаапка киирбит. Киирбит урбаан идиэйэлэрин истэригэр — төрүччү туһунан сахалыы тылынан оҕо кинигэтин таһаарыы, үрүҥ көмүс саастаах дьоҥҥо анаан йога дьарыктарын ыытыы, полиграфия өҥөтүн оҥоруу, видеоконтент оҥорорго оҥоһуу өй туһанан креативнай устуудьуйаны тэрийии, илиинэн оҥоһук оскуолатын арыйыы, саха сылгытын этиттэн бородууксуйаны оҥоруу, национальнай таҥаһы тигии уонна да атын бырайыактар бааллар.
Сыана быһар эспиэрдэр хамыыһыйаларын түмүгүнэн 20 саамай кэскиллээх урбаан идиэйэтэ талылынна. Кыттааччылар бырагыраама сирэй көрсүһэр (очнай) түһүмэҕэр номнуо киирдилэр. Кинилэри үөрэх куурустара, быраактыка сэминээрдэрэ, ситиһиилээх урбаанньыттары кытта көрсүһүүлэр уонна үлэлии турар производствоҕа сылдьыы күүтэр.
Бырагыраама кыттааччыларыттан биирдэстэрэ Марфа Иванова тымныы ньыманан ыган тахсар арыыны оҥорон таһаарыыны тэрийэр былааннаах.
«Мин үйэм тухары наймыга үлэлээбитим, ол эрэн тэҥҥэ кэргэммэр, мүөтүнэн дьарыктанааччыга, көмөлөһөр этим. Соторутааҕыта сынньалаҥҥа барбытым. Билигин тымныы ньыманан ыган тахсар арыыны оҥорон таһаарыынан дьарыктаныахпын баҕарабын. Маныаха миэхэ урбааны салайыы ньымаларын барытын билиэххэ наада: дьыаланы хайдах сөпкө арыйарга, атыылаһааччылары хантан көрдүүргэ, айылҕа бородууксуйатын атыылыырга ханнык докумуоннар наадаларыгар», — диэн кини кэпсээтэ.
Бырайыактары эспиэрдэр хамыыһыйаларыгар көмүскээһин алтынньы 30 күнүгэр буолуоҕа. Кыайыылаах бэйэтин урбаан идиэйэтин олоххо киллэрэргэ 150 тыһыынча солкуобайдаах граны ылыаҕа.
Бырагырааманы тэрийээччи — Саха Өрөспүүбүлүкэтин урбааҥҥа, эргиэҥҥэ уонна туризмҥа министиэристибэтин иһинэн «Мин биисинэһим» киин. Генеральнай бииргэ үлэлэһээччи — Саха Өрөспүүбүлүкэтин мэктиэлиир (гарантиялыыр) пуондата.
Сонун төрдө уонна хаартыска: Урбаан министиэристибэтин МАКС ханаала
-
0
-
0
-
0
-
0
-
0
-
0
