Парламент хаһыата бэчээккэ тахсыыта кэм-кэрдии ирдэбилинэн уонна ол кэмҥэ Саха Сиригэр саҥа атаҕар туран эрэр парламентаризм салгыы сайдан иһиитин кэрэһитинэн буолбута. Сокуону оҥорууга, ылыныыга уустук үлэлэр бара турар кэмнэригэр, “Ил Түмэн” хаһыат Саха Сирин парламенын, дьокутааттарын норуоту кытта ситимнээбитэ. Хаһыат бастакы нүөмэриттэн саҕалаан, сокуону оҥорон таһаарар былаас өрөспүүбүлүкэ дьонун-сэргэтин кытары аһаҕастык кэпсэтэр, санаатын тириэрдэр түрүбүүнэтинэн буолбута.
Хаһыат иккис сылыттан сахалыы уонна нууччалыы тылынан икки туспа хаһыат быһыытынан тахсар буолуоҕуттан, бэчээт эйгэтин, информационнай ырыынак араас уларыйыыларын, ыгыыларын ааһан, билигин бэйэтэ туспа сирэйдээх, суоллаах-иистээх уонна устуоруйалаах хаһыат, туруктаах тэрилтэ быһыытынан биллэр. Бу үйэ чиэппэрэ кэм устата биһиги хаһыаттарбытыгар өрөспүүбүлүкэҕэ биллэр, талааннааах суруналыыстар, бэчээт үлэһиттэрэ, сатабыллаах эрэдээктэрдэр, салайааччылар үлэлээбиттэринэн киэн туттабыт, кинилэр сыраларын-үлэлэрин сыаналыыбыт уонна салгыырга, сайыннарарга дьулуһабыт.
Биһиги хаһыаппыт бу 25 сыл устата бэйэтин суолун тэлэн Арассыыйа бэчээтин эйгэтигэр сыаналанарын, ытыктанарын туоһутунан араас таһымнаах наҕараадаларынан бэлиэтэммитэ буолар. «Ил Түмэн» хаһыат Арассыыйа эрэгийиэннэрин сокуону оҥорон таһаарар былааһыгар тарбахха баттанар, биир дьоһун миэстэни ылар хаһыатынан биллэр.
Ааспыт үйэ бүтэһик сылыгар төрүттэммит хаһыат үйэ чиэппэрин туолар үбүлүөйүн саҥа былааннардаах көрсөр. Билиҥҥи хаһыат кэлэктиибэ ааспыт хамсык дьаҥын кэмигэр дьаныһан, арҕаа дойдулар араас сааҥсыйалары биллэрбит кэмнэригэр уонна Анал байыаннай дьайыы уустуктарын хорсуннук туруулаһан, билигин саҥаттан саҥа технологиялар бырагыраамаларыгар киирсэн, үөрэнэр, сайдар, үүнэр.
Бу бэлиэ күн биһиги хаһыаттарбытын тэрийэн таһаарар Саха Өрөспүүбүлүкэтин Судаарыстыбаннай Мунньаҕар (Ил Түмэн), бэрэссэдээтэл Алексей Еремеевка, Саха Өрөспүүбүлүкэтин Бырабыыталыстыбатыгар, бэрэссэдээтэли солбуйааччы Анатолий Семеновка, Саха Өрөспүүбүлүкэтин инновацияҕа, сыыппараны сайыннарыыга уонна инфокоммуникация технологияларыгар министиэристибэтигэр, миниистир Василий Ефимовка өйөбүллэрин, итэҕэллэрин иһин махтанабыт. Туһунан махталбытын биһиги сурутааччыларбытыгар, ааҕааччыларбытыгар тириэрдэбит.
Хаһыаппыт күн сирин көрбүт күнүгэр биһиги хаһыаттарбытыгар үлэлээбит суруналыыстарга, бэчээт үлэһиттэригэр, эрэдээктэрдэргэ уонна билигин үлэлии сылдьар айар-:тутар кэлэктиипкэ дириҥ ытыктабылбын биллэрэбин, үбүлүөйүнэн эҕэрдэлиибин! Дьолу-соргуну, дьолу, чэгиэн олоҕу, эйэни, үтүөнү баҕарабын!
Мария ХРИСТОФОРОВА,
“Ил Түмэн” издательскай дьиэ” аптаныамынай тэрилтэ генеральнай дириэктэрэ-кылаабынай эрэдээктэрэ,
СӨ култууратын үтүөлээх үлэһитэ,
СӨ Судаарыыстыбаннай Мунньаҕын (Ил Түмэн) VI ыҥырыытын дьокутаата
-
0
-
0
-
0
-
0
-
0
-
0
