Урбаанньыттар нолуогу уонна кирэдьиити хойутуу төлүүллэрин туһунан РФ Бырабыыталыстыбатын уурааҕа алтынньы 17 күнүгэр бэлэм буолуохтаах.
Ити өйүүр миэрэлэр быстах хомуур кэмигэр эрэ туһаныллаллар. Юстиция министиэристибэтэ уонна Оборона министиэристибэтэ федеральнай сокуон барылын бэлэмнээн, Госдумаҕа киллэриэхтээхтэр. Онно этиллэринэн, хомуурунан байыаннай сулууспаҕа ыҥырыллыбыт дьон биисинэс бас билээччилэринэн хаалаллар.
Мобилизацияламмыт урбаанньыттар саҥа салайааччыга дэбиэринэс оҥорон, биисинэстэрин кимиэхэ биэрэллэригэр, дьыалаларын-куолуларын дьаһайалларыгар, хомуналларыгар-тэринэллэригэр барыта 5 (!) күннээх болдьох бэриллэр.
Байыаннай сулууспаҕа ыҥырыллыбыт урбаанньыттарга нолуок, страховой усунуос, о.д.а. булгуччулаах төлөбүрдэр болдьохторун уһатыахтара. Ону тэҥэ кинилэргэ нолуок декларациятын, о.д.а. отчуоттары атын табыгастаах кэмҥэ көһөрүү көрүллэр.
Урбаанньыттар кирэдьииттэрин төлөбүрэ быстах кэмҥэ тохтуон уонна арендаларын болдьоҕо көһүөн сөп.
Хомуурга барбыт урбаанньыт табаары тиэйиигэ, үлэни эбэтэр өҥөнү оҥорууга хантараагы кэмигэр кыайан толорботоҕуна, хантараак усулуобуйата уларыйыан сөп.
Грантовай өйөбүл усулуобуйата эмиэ көннөрүллүөҕэ. Маннык бырайыактар болдьохторун уһатар, ирдэбилин намтатар уонна ыстарааптаах сааҥсыйалары туоратар кыах баар буолуоҕа.
Манна ыйыллыбыт өйөбүл миэрэлэрэ быстах хомуур туһунан ыйаах үлэлиир кэмигэр туттуллар буолуохтара.
-
0
-
0
-
0
-
0
-
0
-
0
