Ыал аҕата Николай Антонович өссө эдэр сааһыттан хаартыскаҕа түһэрэр дьарыктаах, урут аныгы технология сайдыан иннинэ дьиэҕэ уоту барытын арааран баран суорҕаны бүрүнэн олорон, фотопленкатын хостуура. Онтон анал суурадаһыннаах иһиккэ хаартысканы тимир чыскынан тутан ылан бырахтаҕына, кумаҕы кураанах үп үрүҥ ньууругар аҕыйах мүнүүтэнэн дьон сирэйин омооно көстөн, хаартыска туолан, тиллэн барара.
Билигин эмиэ ол дьарыгын бырахпакка, тугу сөбүлүү көрбүтүн, айылҕа кэрэ көстүүтүн, сир аһын, киһи хараҕын үөрдэр сибэккилэри хаартыскаҕа түһэрэр идэлээх. Ыал ийэтэ Марфа Николаевна хас да сыллааҕыта куораттан клубника сиэмэтин атыылаһан, олунньуга рассада олордон, бэс ыйын саҥатыгар таһырдьа буорга көһөрөр.
Клубника элбэх ууну сөбүлүүр буолан, киэһэ аайы уу куталлар, 10 хонукка биирдэ килиэп хоручуоскатын хатаран баран көөнньөрөн аһаталлар.
«Биэнсийэҕэ тахсан баран кэргэммин кытта тэҥҥэ оҕуруоппутугар үлэлиибит, кэнсиэрбэ арааһын оҥоробут, сиэннэр кэлэн көмөлөһөллөр. Клубника от ыйыгар ситэр, атырдьах ыйыгар отоно элбиир, күһүн тоҥоруу түһүөр диэри аһын биэрэр. Отоно кытарда да сиэннэр хомуйан сииллэр. Бөдөҥ минньигэс астаах. Сибэһэйдии тоҥорон кэбиһэбит, кыһын ону саахардаан, дагдаҕа кутан сиибит.
Хаптаҕаһы, моонньоҕону тиэргэммититтэн хомуйабыт, улаханнык аһаппакка итии күннэргэ кыратык уу кутабыт.
Хара кыталык диэн моонньоҕону олордо сылдьыбыппыт, ону угун саҥардан биэрдэххэ биирдэ элбэх аһы биэрэр эбит. Тэлгэһэбитигэр ойуур моонньоҕоно эмиэ үүнэр. Ону эрийэн барыанньалыыбыт, моонньоҕону оргуппакка эрийэн баран саахара ууллуор диэри өр буккуйабыт, оччоҕуна битэмиинин сүтэрбэт», — диэн кэпсиир Николай Антонович.
Черемуха (харас) отонун эмиэ хомуйан барыанньалыахха сөп. Бэс ыйын саҥатыгар хойуутук сибэккилиир, уга тобус-толору мап-маҥан сибэккинэн туолан, сүктэр кыыс курдук тулатын киэргэтэр. Атырдьах ыйын бүтүүтэ бузина, рябина кыһыл отоннонор, черемуха отоно хара. Кыһын рябина кып-кыһыл отонун үрдүгэр мап-маҥан халыҥ хаар көмнөҕө түһэн, түннүктэн көрүөхтэн кэрэ көстүү аһыллар. Виноград курдук хойуу отонун чыычаахтар тоҥсуйан сииллэр.
Тихоновтар сүбүөкүлэни, моркуобу, болгарскай биэрэһи, кабачогу куулунан хомуйаллар, икра, лечо, аджика, кыһыҥҥы салаат арааһын оҥороллор. Помидору тэпилииссэҕэ уонна аһаҕас буорга үүннэрэллэр, быйыл саҥа суорду олордон, элбэх аһы ыллылар. Болгарскай биэрэс иһигэр эриллибит эти уган, кабачогы сарсыарда алаадьы курдук ыһаарылаан, эбэтэр сымыыкка помидору, кабачогы кыра гына кырбаан кутан сииллэрин сөбүлүүллэр.
Николай Тихонов хаартыскаҕа түһэриилэрэ.
- 0
- 1
- 0
- 0
- 0
- 0