Уопсастыба

Мэдэссиинэ балысханнык сайдыаҕыттан, киһи олорор олоҕо уһаата. Ону тэҥэ доруобуйа харыстабылын эбийиэктэрэ аныгы кэмҥэ сөп түбэһэн тутуллаллара, саҥа технологиянан хааччыллыылара үксээтэ.

Таатталар дьолбутугар сүрдээх үлэһит, ирдэбиллээх, бэйэбит кыыспыт Сардаана Кононова кылаабынай бырааһынан ананыаҕыттан, доруобуйа харыстабылын үлэтэ олус тубуста. Хайа күн салайыаҕыттан Сардаана Владимировна эбийиэктэр ис-тас көстүүлэрин тупсарыыга болҕомтотун уурбута уонна нэһилиэктэргэ, улуус киинигэр билиҥҥи олоххо эппиэттиир саҥа ФАП-тары, врачебнай амбулаториялары, поликлиниканы үлэҕэ киллэрэри ситистэ. Бу киэҥ хабааннаах үлэ улууспут баһылыктарын бииргэ үлэлээһиннэринэн барбыта саарбаҕа суох.

Былыт саппыт ааспыты сэгэтэн көрдөххө, улууспутугар, доруобуйа харыстабылын устуоруйата ааспыт үйэ 1898 с. Ян Ребицкэй Баайаҕа нэһилиэгэр балыыһаны үлэлэтиэҕиттэн, саҕаламмыта. Биир үйэттэн тахса кэм иһигэр улууспутугар төһөлөөх элбэх эмчит, санитарка, ас астааччы, суоппар уо.д.а. үлэлээн ааспыттара буолуой?

Сылллар хонугунан солбуллар устуоруйаларын салҕаныытын бэҕэһээ, бүгүн өссө төгүл көрдүбүт. Ол курдук, улуус баһылыгын Айаал Бурцев уонна дойдуга тиийэ биллэр үлэлээх-хамнастаах, өрөспүүбүлүкэ биир тутаах үөрэҕин кыһатын, Дьокуускайдааҕы В.А.Вонгродскай аатынан мэдэссиинэ кэллиэһин дириэктэрэ Дмитрий Алексеев бииргэ үлэлээһиннэрин түмүгэр, Тааттаҕа сиэстэрэлэри уонна биэлсэрдэри үөрэтэр салаа аһыллыытын сиэрэ-туома буолан ааста. Быйылгы үөрэх дьылыгар икки салаанан лоп курдук 40 устудьуон үөрэниэҕэ.

-- Каадырдарынан хааччыллыы курдук сүрүн кыһалҕаны быһаараары, эһиэхэ ааҥҥытыгар тиийэ бэйэбитинэн кэллибит. Бу улахан суолталаах, инники сайдыыны түстүүр дьыаланы улуус баһылыга Айаал Бурцев, кылаабынай быраас Сардаана Кононова, дьокутааттар улуустааҕы мунньахтарын бэрэссэдээтэлэ Петр Максимов, нэһилиэк баһылыга Егор Павлов, оскуола дириэктэрэ Иван Будикин, медицинскэй кылаас аһыллыытын акылаатын уурбут дириэктэр Анна Мосоркина өйөбүллэринэн тэриллэн арылынна. Инникитин бу сала үлэлиир кэскилин быйыл киирбит устудьуоннарбыт быһаарыахтара. Онон кинилэргэ ситиһиилээх үөрэҕи баҕарабын, -- диэтэ Дмитрий Афанасьевич.

Үөрүүлээх тэрээһини салҕаан, Тыараһа нэһилиэгэр саҥа врачебнай амбулатория аанын арыйда. Нэһилиэк олохтоохторун өр кэтэспит баҕа санаалара туолла!

Бу курдук Таатта улууһун доруобуйатын харыстабылын эйгэтэ сайда турарын, үчүгэй үлэлээҕин, икки күннээх үөрүүлээх тэрээһиннэр туоһулууллар.