Көрсүһүүгэ икки өрөспүүбүлүкэ култуурунай-гуманитарнай өттүнэн бииргэ үлэлээһиннэригэр тирээн турар боппуруостар тула киэҥ кэпсэтии ыытылынна. Александр Жирков бэйэтин эҕэрдэ тылыгар биир алтаай салаатыгар киирэр саха уонна кыргыз норуоттарын история, култуура өттүнэн алтыһыыларын туһунан кэпсээтэ. Саха ньургун уола, сэбиэскэй судаарыстыбаннай уонна партийнай диэйэтэл Максим Аммосов Саха сирин уонна Кыргызтан өрөспүүбүлүкэлэрин судаарыстыбаннастарын төрүттэспитин, бу өрөспүүбүлүкэлэр национальнай интеллигенцияларын араҥаччылааһыҥҥа элбэҕи оҥорбутун бэлиэтээтэ.
– Максим Аммосов олоҕун саамай өрөгөйө уонна кутурҕаннаах трагедията Кыргызстаны кытары ситимнээх, -- диэтэ Александр Жирков, салгыы быйыл Саха Өрөспүүбүлүкэтин 100 сыла, Максим Аммосов төрөөбүтэ 125 сыла бэлиэтэнэрин этэн туран, Кыргыз Өрөспүүбүлүкэтин дэлэгээссийэтин үбүлүөйдээх тэрээһиҥҥэ кыттарга ыҥырда.
Суйунбек Касмамбетов икки өрөспүүбүлүкэ култуурунай-гуманитарнай өттүнэн бииргэ үлэлэһиннэрин салгыы сайыннарарга Кыргыз өрөспүүбүлүкэтэ интэриэстээҕин итиэннэ былааннанар дьаһалларга көхтөөхтүк кыттарга бэлэмин биллэрдэ.
Көрсүһүү түмүктэниитигэр Суйунбек Касмамбетов икки өрөспүүбүлүкэ култуурунай-гуманитарнай өттүнэн бииргэ үлэлээһиннэригэр сүҥкэн кылатын киллэрбитин иһин, Александр Жирковка Кыргыз Өрөспүүбүлүкэтин Бэрэсидьиэнэ Садыр Жапаров аатыттан махтал сурук туттарылынна. Даҕатан эттэххэ, Александр Жирков «Манас» эпоһын сахалыы тылбаастаабыта диэн Кыргызтан биллэрэр-иһитиннэрэр портала www.kginform.com /Kginform/ суруйда.
-
0
-
0
-
0
-
0
-
0
-
0
