Төгүрүк остуол кыттыылаахтарын губернатор э.т. Мария Костюк эҕэрдэлээтэ уонна Еврейскэй аптаныамыйалаах уокурук Уһук Илин Дьоруойдарын тардар киининэн, итиэннэ АБДь кыттыылаахтарын, кинилэр чугас дьоннорун өйүүргэ кэлим уокуруктааҕы стратегия былаһааккатынан буолбутун эттэ. Маныаха, хаачыстыбалаах нуормалыыр быраап баазата суох бары өттүнэн өйөбүлү хааччыйар кыаллыбатын тоһоҕолоон бэлиэтээтэ.
Арассыыйа Дьоруойа Алексей Романов дьоруойдар кэккэлэриттэн сокуону оҥорооччулар тахсыахтаахтарын туһунан Бэрэсидьиэн В. Путин эппитин санатта: «Муниципальнай да, эрэгийиэн да таһымыгар, Госдуумаҕа да сокуону оҥорууга үлэлиир АБДь кыттыылаахтара бааллар. Бу улахан суолталаах, тоҕо диэтэххэ, сокуону оҥорооччулар быһаарыыларыттан олус элбэх тутулуктаах. Еврейскэй аптаныамыйа бу хайысхаҕа лиидэринэн буолар», - диэтэ А. Романов.
Төгүрүк остуолга ЕАУо Сокуону оҥорор Мунньаҕын бэрэссэдээтэлэ Роман Бойко, АБДь бэтэрээннэрин ассоциациятын толорооччу дириэктэрэ Дмитрий Афанасьев тыл эттилэр.
Төгүрүк остуол модератора, ЕАУо парламенын бэрэссэдээтэлин солбуйааччы Андрей Голубь ОДьХХ өҥөтүн толуйуу, байыаннай дьайыы бэтэрээннэрин үлэнэн хааччыйыы, үрдүк үөрэххэ үөрэтии, ипотеканы ылыы, 1-кы группалаах инбэлииттэри көрөр-истэр АБДЬ кыттыылаахтарын аймахтарын өйөөһүн боппуруостарын туруорда.
Төгүрүк остуол кыттыылаахтара тыа сиригэр төннүбүт байыастары чөлгө түһэрии, АБДь кыттыылаахтарын оҕолоро төгүрүк сыл лааҕырга сынньаналларын хааччыйыы, эрэгийиэннэр ассоциацияларын икки ардыгар бииргэ үлэлээһин уонна өйөбүл саҥа мэхэньииһимнэрин үөскэтии тула дьүүллэстилэр.
Төгүрүк остуолга нуормалыыр быраап баазатын тупсарыыга киирбит этиилэри ЕАУо парламена сиһилии көрүөҕэ, үөрэтиэҕэ уонна федеральнай былаас уорганнарыгар тиэрдиэҕэ.
Бу суолталаах тэрээһиҥҥэ СӨ Судаарыстыбаннай Мунньаҕын (Ил Түмэн) Бэрэссэдээтэлэ Алексей Еремеев салалтатынан Саха Сириттэн салайар уонна сокуону оҥорор эйгэҕэ үлэлиир АБДь бэтэрээннэрэ кытыннылар.
Сиһилии: #@iltumen">https://web.telegram.org/k/#@iltumen
Иһитиннэрии уонна хаартыска: Ил Түмэн пресс-сулууспата
-
0
-
0
-
0
-
0
-
0
-
0
