Бүгүн-сарсын тапталлаах куораппыт – Дьокуускай төрөөбүт күнүн бэлиэтиэхпит. Субуотаҕа уонна сүрүн тэрээһиннэрэ өрөбүлгэ былааннанан, бырааһынньыктааҕы бырагыраама бэрт киэҥник ыҥыра, угуйа тарҕанна. Долгуйар Дьокуускайбыт 392 сыллаах төрөөбүт күнүн долгуйа кэтэһэбит, көрүөхпүт, үөрүөхпүт турдаҕа.
Онтон куорат баһылыга Евгений Григорьев үгэс быһыытынан куораппыт күнүн иннинэ туох ситиһиилээх, кыһалҕалаах көрсөрүн туһунан быһа эпииргэ тахсан, ыйытык-хоруй пуорматынан билиһиннэрдэ. Онтон кэрчиктэри таһаарабыт.
– Даркылаахтыыр суол саҕаланыыта 4 балаһаланыа. Сэбиэскэй Аармыйа 50 сыла уулуссаны өрөмүөннээһиҥҥэ билигин бырайыак уонна симиэтэ докумуоннарын оҥоруу түмүктэнэн эрэр. Быйыл эспэртиисэни ааһара, аукциона ыытыллара былаан быһыытынан толоруллуохтаах.Онон 2024-26 сылларга бүддьүөт былаанынан Бабушкин уул.—Кальвица уул. кэрчигэр суол 4 балаһаҕа диэри кэҥэтиллэрэ, оттон иккис түһүмэҕинэн Бабушкин уул.—Нам суолугар диэри өрөмүөн ыытыллыахтаах.
– Дьиэ тиэргэннэрэ төрдүттэн саҥардыллаллар. Бу нэһилиэнньэни түмэр, дьон таһырдьа элбэх бириэмэни атааралларыгар кыах биэрэр. Бырайыагы салгыы ыытар олус наадалаах. 2030 сылга диэри 385 тиэргэни саҥардар былаан баар, олортон 127 бэлэм, быйыл халлаан туруга туран биэрдэҕинэ, өссө 15 тиэргэн өрөмүөнэ түмүктэниэхтээх.
– Уопсастыбаннай тырааныспарга суоппар тиийбэт. Бу күһүн чааһынай тиэйээччилэри кытта дуогабардар саҥардыллыахтаахтар, онно оптуобустар ис, тас туруктарыгар, суоппар тас көстүүтүгэр тиийэ ирдэбил кытаатыахтаах. Куораттааҕы суол-тырааныспар сулууспата маршруттары уонна суоппардары күн аайы бэрэбиэркэлиир. Кэһии тахсар түгэнигэр, дьаһалтаҕа эрийиэххитин сөп.
– Биэнсийэлээхтэр ырааһы тутуһарга көмөлөһүөхтэрин сөп. Сайсаар олохтооҕое эпииргэ Сайсары эбэ кытылын тупсарыы үлэтин бастакы түмүктэрин хайҕаата. Ол эрээри, кытыл бөх-сыыс буолан, киртийбитин бэлиэтээн туран, бэйэтин Сайсары кытылын ыраастыыр дворнигынан туруорда. Ону таһынан Бүлүүлүүр суолга бөх сыбаалкатыгар диэри эмиэ бөҕү хомуйарга биригээдэни наймылаһар туһунан этии киллэрдэ: “Биһиги, биэнсийэлээхтэр, иллэҥ кэммит элбэх, онон куораппыт көстүүтэ тупсарыгар, бэрээдэги уонна ырааһы тутуһарга кыра да харчыга көмөлөһүөхпүтүн сөп”, - диэн Евгений Григорьев Захар Колодезниковка махтанна уонна эпиир кэннэ сибээстэһиэхпит диэн эрэннэрдэ.
– Куорат күнүгэр 2000 мас олордуллуоҕа, ол оннугар улахан кэнсиэрдэр уонна салют ыытыллыахтара суоҕа. Сүрүн болҕомто устуоруйаҕа уонна култуура нэһилиэстибэтигэр ууруллуоҕа. Субуотаҕа “GreenWorks” хампаанньаны кытта Кыайыы пааркатын аттыгар 2000-ча мас олордуллуоҕа. Куорат олохтоохторун көхтөөхтүк кыттарга ыҥыраллар. Ону таһынан 12 саҥа оптуобуһу үөрүүлээхтик үлэҕэ киллэрии буолуоҕа, Кырдьаҕас куоракка үгэс буолбут бырааһынньыктааҕы күүлэй уонна Преображенскай таҥара дьиэтиттэн сэлэлии хаамыы ыытыллыаҕа.
Куорат сайдыыта билигин Арассыыйа бэрэсидьиэнинэн бигэргэммит маастар-былаан чэрчитинэн барар. Ол курдук, бу күннэргэ Владивостокка ыытылла турар экэнэмиичэскэй пуорумҥа Ил Дархан Айсен Николаев Уһук Илин куораттарын маастар-былааннарыгар этиилэри киллэрдэ: “Дьокуускай уонна Нерюнгри маастар-былааннарын үбүн-харчытын уопсай кээмэйэ 562 млрд солк. Маастар-былааҥҥа киирбит пууннары олоххо киллэриигэ бары мэхэньиисимнэри туһаныахпыт. Ол курдук, инфраструктурнай бүддьүөт кирэдьииттэрин, анал хааһына кирэдьииттэрин, ДОМ.РФ инфраструктурнай облигацияларын.Сорох бырайыактары Уһук Илиҥҥи концессияны уонна ВЭБ.РФ чэпчэтиилээх сайыамнарын туһанан олоххо киллэрэргэ эрэнэбит».
Хаартыскалар куйаар ситимиттэн ылылыннылар
-
0
-
1
-
0
-
0
-
0
-
0
