Издательский дом Редакция Подписка
Погода в Якутске: . -12 oC

Университекка экэниэмикэҕэ лиэксийэ ааҕарын таһынан, Сандал Николаевич бастакы куурустарга кураатардыыр. Устудьуоннар эргиччи билиилээх, оттомноох, лоп-бааччы кураатардарын ытыктыыллар.

Университекка экэниэмикэҕэ лиэксийэ ааҕарын таһынан, Сандал Николаевич бастакы куурустарга кураатардыыр. Устудьуоннар эргиччи билиилээх, оттомноох, лоп-бааччы кураатардарын ытыктыыллар.

Устудьуоннар барахсаттар учууталларга барыларыгар кэриэтэ хос аат биэрэ охсоллорунан уратылаахтар. Дьэ, эҥин араас аат эрэ дэлэй диэтэҕиҥ. Логикаҕа лиэксийэ ааҕар, намчы, эдэр Алексееваны былырыын «Лотос-Логос» диэн ааттыахтарыттан ыла аны атыннык ааттаммат. Кылгатан сорохтор «Лотос» дииллэр. «Логос» диэбэттэр, тоҕо диэтэххэ, урут логиканы үөрэппит кырдьаҕас бэрэпиэссэр Егоровы «Логос Оҕонньор» дииллэрэ. Үрдүкү математиканы биэрэр, түөрт уончалаах, мааны, куруук чэбэрдик таҥна-сапта сылдьар Логинованы таптаан, «Логарифма» дииллэр. Оттон Сандал Николаевичка хайа эрэ сытыы тыллаах устудьуон «Экомоник» диэн хос аат иҥэрбитэ. Бастатан туран, ити аат экономика диэн, үөрэтэр дьиссиппилиинэтин аатын майгынныыр дорҕооннортон турара. Иккиһинэн, Моника диэн кыыһы сөбүлүүрүн «кистээн» ыйара. Бэйи эрэ, ол хайдах саҕаланна этэй?

«Моника… Ураты даҕаны аат дии. Итинник ааттаах актриса баар быһыылаах этэ.. Тоҕо кини санаабыттан арахпат буолла?» – Сандал Николаевич эргэ планшетын ылан, сымнаҕас, хара тирии бүрүөһүннээх кириэһилэтигэр олорбута. Планшетын мониторун таарыйталаан, араас сыһыарыылары арыйталаабыта эрээри, бэйэтин санаатыгар аралдьыйан, тугу даҕаны өйдөөн аахпакка олорбута.

Хайдах билистилэр этэй Моникалыын? ...Күһүн, уопсай дьиэ аактабай саалатыгар мунньан, куурус оҕолоругар кылгас бэсиэдэ оҥорбута. Бүтэн, устудьуоннар тарҕаспыттарын кэннэ, хомунан тахсаары турдаҕына, көрүдүөргэ кыргыттар күлсэн лыҥкынаһар саҥалара иһиллибитэ уонна саала икки аҥыы аһыллар аана тэлэллэ түспүтэ. Төрдүс кууруска үөрэнэр Лера Валькованы кытта урут көрбөтөх кыыһа киирэн кэлбитэ. Ол Моника Лера тастыҥ эдьиийэ этэ. Кыргыттар дорооболоһон баран, саала ортотугар турар теннис остуолун икки өттүгэр арахсан, теннистээн киирэн барбыттара.

Сандал Николаевич, ачыкытын көннөрүнэн, кыргыттар сэргэхтик оонньуулларын кэрэхсии одууласпыта. Моника чэпчэкитик туттан-хаптан, үөрүйэхтик оонньуурун бэлиэтии көрбүтэ. Кини оонньооччулар аттыларыгар кэлэн, сүбэ-ама биэриэн баҕарбыта эрээри: «Преподаватель баарыгар кыбыстан, аһыллан оонньуохтара суоҕа», – дии санаан, кыл сэлээппэтин илиитигэр туппутунан (интэлигиэн буолан, дьиэ иһигэр бэргэһэтин кэппэт) тахсар аан диэки барбыта. Моника ол кэмҥэ пинг-понг маҥан шаригын хаҥас илиитигэр хабан ылаат, Аргуновка эргиллибитэ уонна: «Оонньуубут дуо?» — диэн ыйыппыта, мичээрдээн үрүҥ тиистэрэ кэчигирэспиттэрэ. Лера хараҕар түспүт баттаҕын сүүмэхтэрин алын уоһун ыртатан өрө үрбүтэ уонна ракеткатын улгумнук преподавательгэ ууммута, мичээрдээбитэ: «Сандал Ньукулаайабыс, кылааскытын көрдөрүҥ эрэ». Кини эдьиийэ үчүгэйдик оонньуурун билэр буолан, «кэбэҕэстик кыайыа» дии санаабыта.

Сандал Николаевич саарбахтаабыттыы тура түспүтэ. Онтон: «Оскуолаҕа сылдьан оонньуур этим ээ», – диэт күрэҥ болтуотун устан, ыскамыайкаҕа уурбута. Валерияттан аҥар өттө хара, атына кыһыл өҥнөөх ракетканы ылан, остуол таһыгар кэлбитэ. Маҕан мээчик тобурҕаан, от күөх остуол ньууруттан тэйиэккэлээн, сиэккэ уҥуор-маҥаар көтүөккэлээбитэ. Ол эрэн маҥнайгы куурустар кураатардара уонна Моника бэрт «эйэлээхтик» киирсибиттэрэ. Моника, бэл, бэркэ сатыыр «топ-спинин» ньыматынан эрийэн быһар албаһын туттубатаҕа. Икки партия кэнниттэн тохтообуттара. Аргунов, итииргээн, соруочукатын моонньун тимэҕин өһүлбүтэ, кыыстыын сэргэстэһэ олорбута уонна Лера бэрт сытыытык Кароматуллоны кытары оонньуулларын көрбүттэрэ. Кароматулло Мирзоевы табаарыстара таптаан «Каро» диэн кылгатан ааттыыллара. Теннистээн тэйиэккэлиир Лераҕа иккиэн кыһанан ыалдьыбыттара да, Каро уол тулуппатаҕа.

Онтон Сандал Николаевич Моникаттан, куорат таһынааҕы Сыырдаах бөһүөлэгэр олорорун истэн, төгүрүк сыл устатыгар үлэлиир «Саюри» диэн тэпилииссэ комплексын оҕурсутун, помидорун туһунан ыйыталаспыта, кыыска бэйэтин нүөмэрин биэрбитэ, салгыы сибээстэһиэх буолбуттара.

Сарсыныгар Моника Сандал Николаевичка бассаабынан смайлик ыыппыта. Аргунов тута хардаран, «бирибиэттэспитэ». Итинтэн ыла суруйсар, кэпсэтэр буолбуттара. Моника Сыырдаахха олороро. Куоракка биирдэ эмэ кэлэн барара. Биирдэ Сандал Николаевичтыын болдьоһон, «Синемаҕа» «Чудо-женщина» диэн киинэҕэ сылдьыбыттара. Онтон Аргунов биирдэ, дьээбэлэммиччэ эбитэ дуу, кумааҕыга сурук суруйан, почтанан кыыска ыыппыта. Онно кини маннык суруйбута: «Күндү Моника, дорообото тут! Өйүүн, олунньу 2 күнүгэр, «Ы» буукуба күнэ. Эн сэлиэнньэҥ аатыгар адьас икки «ы» буукуба баарынан, бу бырааһынньыгынан эҕэрдэлиибин. Суругум хойутаабакка тиийиэ диэн эрэнэбин. Сарсын Сибэтиэй Луиза күнэ. Ийэҕэр Луиза Федоровнаҕа төрөөбүт күнүнэн истиҥ эҕэрдэтэ тиэрт. Эн хаһан куоракка киирэ сылдьыаххыный? Гриль-кафеҕа сылдьыах буолбуппут дии. Сандал».

Сотору буолаат Моникаттан кэмбиэрдээх суругу туппута. Итинтэн ыла бассаапка суруйбатах санааларын көннөрү суругунан атастаһар буолбуттара. Ити курдук сыл аҥаарыттан ордук доҕордоспуттара. Сүрдээҕин тапсаллара. Кинилэр бырааһынньыктарга аккырыыкка ыытыһаллара, нэдиэлэҕэ биирдэ-иккитэ көрсөн, куорат устун дьаарбайаллара. Биирдэ, сайын, Сандал Николаевич массыынатынан Сыырдаахха баран, «Саюриттан» помидор, оҕурсу ылбыта. Болдьоһон, Мониканы көрсүбүтэ. Массыынанан хатааһылыы таарыйа Намныыр суол устун элээрдибиттэрэ. Астына хатааһылаан кэлэн, кыыһы дьиэтигэр аҕалан баран, Аргунов симиттэ-симиттэ эппитэ: «Моника, мин эйигин наар санаан тахсабын. Эйигин таптыыбын… Эн биһи холбоһуох. Сааспыт араастаһара туох да оруола суох…».

Моника Сандал Николаевич диэки көрбүтэ, мичээрдээбитэ уонна курустук эппитэ: «Оруоллаах. Мин эйиэхэ сылаастык сыһыаннаһабын. Доҕордоһорбутуттан үөрэбин. Баҕар, таптыырым да буолуо. Ол эрэн эйиэхэ кэргэн таҕыстахпына, кэнэҕэс ыарахаттар баар буолуохтара. Биирбит эдэрин быһыытынан кулууптуон баҕарыа, биирбит сааһыран, дьиэҕэ олорорун ордоруо… Эн бэйэҕэр сөптөөх паараны булуоҥ. Мин эмиэ… ол кэриэтин, доҕордуу хаалыахха…».

Эйэ дэмнээхтик массыынаттан тахсан, Моника дьиэтин олбуорун кэлииккэтигэр киирэн хаалбыта. Моника аккаастаабытыттан хомойон, Сандал Николаевич хараҕын уута бычалыйан тахса сыспыта. Туманнырбыт ачыкытын устан, тэтэркэй сибэкки ойуулаах сырдык былатыагынан линзаларын кичэйэн соппута. «D-фрейм» диэн муодунай иилээх, солотуута кылабачыйар ачыкытын салҕалаабыт илиитинэн аа-дьуо кэҥэриитигэр олордубута. Онтон уруулун куораттыыр суол диэки салайбыта. Дьиэлииригэр, санааҕа ылларан, бэрт бытаанныык сыылларан айаннаабыта. Кэнниттэн ситэн кэлэр сыыдам тимир көлөлөр бастаан утаа сигнааллаан, тиэтэтэн көрөн баран, иннилэригэр утары иһэр тиэхиньикэ ыраахха диэри көстүбэт буоллаҕына, ситэн ааһаллара.

Дьокуускай куоракка баар Алексеева ааптарыскай оскуолатын Сандал Аргунов 13 саастааҕар бүтэрбитэ. Тута үрдүк үөрэххэ киирбитэ. Ийэтэ уолун бэрийэн, дьаныһан үөрэттэрбэтэҕэ буоллар, бука, үрдүк үөрэҕи бүтэрэрэ уустук буолуо этэ. Алта сылынан, 19- гар, магистратураны бүтэрбитигэр, кэскиллээх исписэлииһи университекка ассистент дуоһунаһыгар преподавателинэн хаалларбыттара. Оттон Моника бастаан көрсөллөрүгэр сааһа 29-һа этэ. Кини Сандалтан уон сыл аҕата.

«Чэ, буоллун. Баҕар, кэлин Моника санаата уларыйыаҕа», – диэн Сандал Николаевич бэйэтин уоскуппута уонна массыынатын араадьыйатыгар сахалыы «Викторияны» холбообута. Солуон иһин Лэгэнтэй «Ыһыах» диэн ырыата толорон кэбиспитэ...

Ааптар уруһуйа.

  • 1
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Суоппар буолар уустугурда

Муус устар 1 күнүттэн байаҥкамаат бэбиэскэтиттэн куотунар дьону тырааныспары ыытар…
28.03.24 17:19
Лента новостей

Интерактивнай быыстапка

«Арассыыйа – Мин устуоруйам» мультимедийнай устуоруйа пааркатыгар кулун тутар 20 күнүттэн…
28.03.24 16:23