Тэрээһиҥҥэ СӨ Култуураҕа уонна духуобунай сайдыыга миниистирэ Юрий Куприянов, Саха Өрөспүүбүлүкэтин Ил Дарханын иһинэн Олоҥхо Национальнай кэмитиэтин бэрэссэдээтэлин солбуйааччыта, М.К. Аммосов аатынан ХИФУ Бэрэсидьиэнэ Евгения Михайлова, СӨ Тас сибээстэргэ миниистири солбуйааччы Сергей Хатылыков, филологическай наука доктора, профессор, эпосовед Василий Илларионов, «Айар» национальнай кинигэ кыһата генеральнай дириэктэрэ Август Егоров, режиссер, сценарист, САССР уонна РФ ускуустубатын үтүөлээх диэйэтэлэ, СӨ Судаарыстыбаннай сүбэһитэ Андрей Борисов, уо.д.а. кыттыыны ыллылар.
- Түгэнинэн туһанан, Саха Сиригэр Олоҥхо күнүнэн барыгытын эҕэрдэлиибин! Биһиги биир күнүнэн муҥурдаммакка, олоҥхоҕо аналлаах дэкээдэни тэрийэргэ быһаарынныбыт. Быйыл араас тэрээһиннэр буоллулар, ол иһигэр саҥа көрүҥнэринэн эмиэ. Бүгүн биһиги икки ураты кинигэни билиһиннэрэбит, олортон биирдэстэрэ - саха тылынан саҥардыллыбыт «Дьулуруйар Ньургун Боотур» эпос толору хомуура. «Дьулуруйар Ньургун Боотур» кинигэ хаттаан бэчээттэниитэ Саха АССР тэриллибитэ 100 сылын бэлиэтээһиннэрин былааныгар киллэриллибитэ. Кинигэ 1500 экземплярынан таҕыста, олортон өрөспүүбүлүкэ бибилэтиэкэлэригэр 500-һү биэрдибит», - диэн Юрий Куприянов бэлиэтээтэ.
Саха сэбиэскэй литературатын төрүттээбит Платон Алексеевич Ойуунускай оҥорбут саха дьоруойун эпоһа аан бастаан 2003 сыллаахха бэчээттэммитэ уонна суруйааччы төрөөбүтэ 110 сылыгар анаммыта. Кинигэ хаттаан Саха АССР тэриллибитэ 100 сылыгар саҥардыллан бэчээттэннэ. Хомуурунньугу таһаарыыга өрөспүүбүлүкэ Бырабыыталыстыбата 4 мөл. солк. көрбүтэ. Толорооччу – СӨ Култуураҕа уонна духуобунай сайдыыга министиэристибэ, таһаарааччы - « Ю. А. Гагарин аатынан Дьокуускайдааҕы типография» АУо.
Оттон Ил Түмэн Бэрэссэдээтэлин бастакы солбуйааччыта Александр Жирков иилээн-саҕалаан ЮНЕСКО өйөбүлүнэн ыытыллар “Аан дойду норуоттарын эпическэй айымньылара” бырайыак чэрчитинэн "Кунан Хара" тыба омук дьоруойдуу эпоһа саха тылыгар тылбаастаммыта.Александр Жирков эпическэй айымньылары хардарыта тылбаастааһыҥҥа, норуоттар төрүт култуураларын, үгэстэрин уонна сиэрдэрин-туомнарын харыстааһыҥҥа, төрөөбүт тылы сайыннарыыга үлэтэ, өрөспүүбүлүкэлэр уонна Арассыыйа судаарыстыбаннай сайдыыларыгар оруола сүҥкэн улахан.
-
3
-
0
-
0
-
1
-
0
-
0
