РФ Уопсастыбаннай палаататыгар Бүтүн Арассыыйатааҕы «Оскуола бастыҥ остолобуойа-2022» куонкурус суперфинал сүрүн номинацияларынан кыайыылаахтара билиннилэр. Куонкуруска дойду үрдүнэн 400-тэн тахса кыттааччы кулинарнай маастарыстыбаҕа күрэхтэстилэр, «сарсыҥҥы күн» оскуола аһылыгын саҥа испииһэгин билиһиннэрдилэр, практическай квестары аастылар, маастар-кылаастарга уонна төгүрүк остуолларга кытыннылар.
«Оскуола остолобуойун бастыҥ повара» үрдүк ааты Москубаттан Сергей Газизов уонна Башкортостантан Татьяна Екимова үллэһиннилэр.
«Куораттааҕы оскуола бастыҥ остолобуойа» номинацияҕа кыайыылаахтарынан А.В. Гордеев аатынан Бобровскай үөрэх киинэ (Воронежскай уобалас), 161 №-дээх лицей (Уфа), «Надежда» коррекционнай оскуола (Соҕуруу Сахалинск), 6 №- дээх орто оскуола (Великих Лук), 10 №-дээх орто оскуола (Саранск), М. Вахитов аатынан 2 №-дээх гимназия (Набержные Челны) буоллулар.
«Тыа сиринээҕи оскуола бастыҥ остолобуойа» номинацияҕа Ново-Гурьевскай бөһүөлэк оскуолата (Калининградскай уобалас), Ахмат-Хаджи Кадыров аатынан Садовай орто оскуолата (Чеченскай Өрөспүүбүлүкэ), Данильченко аатынан 5 №-дээх орто оскуола (Краснодарскай кыраай), Сельцовскай орто оскуолата (Ленинградскай уобалас), 1 №-дээх Иглинскай орто оскуолата (Башкортостан Өрөспүүбүлүкэтэ) уонна Заостровскай орто оскуолата (Архангельскай уобалас) кыайдылар.
«Мөлүйүөннээх куорат оскуола бастыҥ остолобуойа» номинацияҕа 1554 №-дээх оскуола (Москуба), 24№-дээх оскуола (Нижегородскай уобалас), 75 №-дээх оскуола(Волгоград), 159 №-дээх лицей (Казань) уонна 2 №-дээх үөрэх киинэ (Челябинск) буоллулар.
Оттон Үөһээ Бүлүү улууһун Кэнтик орто оскуолатын повардара Вера Дмитриева уонна Людмила Иванова Уфа куоракка полуфиналга уонна финалга үрдүк баалы ылан, Москуба куоракка суперфиналга кыттары ситиспиттэрэ. Күрэх түмүгүнэн, суперфиналга Лауреат уонна дойду үрдүнэн «Саамай хаардаах оскуола» үрдүк ааты сүктүлэр, дипломунан наҕараадаланнылар.
Санаттахха, Саха Сиригэр Никифор Кирикович Седалищев-Дьүөгэ Ааныстыырап аатынан Үөһээ Бүлүү улууһун Кэнтик орто оскуолата "Тыа сиринээҕи оскуола бастыҥ остолобуойа -2022" номинацияҕа кыайыылаах буолбута. Салгыы федеральнай күрэххэ хамаанданан повардар Вера Дмитриева, Людмила Семенова, салайааччыларынан оскуолаҕа иитэр үлэҕэ сэбиэдиссэйэ Степан Родионов, "Оҕо технопарката" эбии үөрэхтээһиҥҥэ дириэктэри солбуйааччы Екатерина Иванова уонна оскуолаҕа мэдиссиинэ сиэстэрэтэ Саргылана Стручкова кытыннылар.
Бу иннинээҕи сонуннары манна аах:
Уфаҕа «Оскуола бастыҥ остолобуойа-2022» күрэх саҕаланна
Кэнтиктэн өрөспүүбүлүкэ бастыҥ повардара айаҥҥа туруннулар
Өрөспүүбүлүкэ бастыҥ оскуола остолобуойдара билиннилэр
-
8
-
1
-
0
-
0
-
0
-
0
