Саха сиригэр 700-кэ быыбардыыр учаастак аһыллан үлэлиэхтээх. Учаастаккыт ханан баарын бу http://cikrf.ru/digital-services/naydi-svoy-izbiratelnyy-uchastok/ сыылканы арыйан билсиэххитин сөп.
Куоластааһын туох баар санитарнай-эпидемиологическай ирдэбили тутуһан ыытыллар. Хамыыһыйа чилиэннэрин, кэтээччилэри, суруналыыстары уонна куоластааччылары -- барыларын биирдэ кэтиллэр маасканан, бэрчээккинэн хааччыйыахтара. Термометрынан кыраадыскытын бэрэбиэркэлиэхтэрэ, илиигитин антисептигынан ыстарыахтара. Куоластыыр сири эмиэ сотору-сотору дезинфекциялыыр буолуохтара. Бэйэ-бэйэҕититтэн тэйиччи тураргытыгар анаан, ыйар бэлиэлэри муостаҕа ойуулуохтара.
Куоластыыр күн дьиэҕитигэр суох буолар эбэтэр регистрацияламмыт аадырыскытыгар олорбот буоллаххытына, ханнык баҕарар эһиэхэ табыгастаах учаастакка тиийэн куоластыыр бырааптааххыт. Онуоха эрдэ сайабылыанньа биэриэххитин наада -- бэс ыйын 5-21 күннэригэр “Мои документы” элбэх хайысхалаах киин уонна “Госуслуги” портал нөҥүө. Эбэтэр территориальнай быыбардыыр хамыыһыйаларга. Алданнааҕы, Ленскэйдээҕи, Мииринэйдээҕи, Нерюнгритааҕы, Дьокуускайдааҕы хамыыһыйалар бэс ыйын 21 күнүгэр диэри хас күн аайы сарсыарда 9-тан киэһэ 18.00 чааска диэри үлэлииллэр. Онтон атыттар эбиэккэ (14.00 ч.) диэри.
Аны туран, уустук эпидемиологическай балаһыанньанан, бэс ыйын 25-30 күннэригэр эрдэ куоластыаххытын сөп. Маннык быһаарыныы куоластааһын күнүгэр элбэх киһи мустарын аччатан биэрэр соруктаах. Өскөтүн, дьиэҕититтэн олорон куоластыаххытын баҕарар буоллаххытына, ол баҕа санааҕытын быыбар хамыыһыйатыгар бэс ыйын 16 күнүттэн от ыйын 1 күнүн киэһэ 17.00 чааска диэри волонтердарынан эбэтэр чугас дьоҥҥутунан тиэрдиҥ. Биитэр “Госуслуги” портал нөҥүө сайабылыанньата биэриҥ.
РФ Төрүт Сокуонугар киирэр көннөрүүлэр тустарынан иҥэн-тоҥон ааҕа илик буоллаххытына, http://www.cikrf.ru/ саайка киирэн билсиҥ. Аны туран, куоластааччылар испииһэктэригэр чопчу киирбиккитин билиэххитин баҕарар, итиэннэ атын да боппуруостаах буоллаххытына, 8 800 200 00 20 нүөмэргэ эрийэн ыйыталаһыҥ.
-
0
-
0
-
0
-
0
-
0
-
0
