Уопсастыба

Норуот дьокутаата Елена Голомарева Сааскылаах нэһилиэгэ төрүттэммитэ 95 сыллаах үөрүүлээх киэһэтигэр сааскылаахтарга истиҥ эҕэрдэтин этэн туран, улуус баһылыга Эдуард Платоновка уонна эбэҥки нэһилиэгэ социальнай-экономическай олоҕор кылааттарын киллэрбит үтүөкэн дьонугар Ил Түмэн Махтал суруктарын туттарда. Маны таһынан кини нэһилиэк биллэр уопсастыбанньыга Валентина Черемкинаҕа СР сэллик ыарыытын утары үтүө суобастаах үлэтин иһин түөскэ кэтэр мэтээли ытыс тыаһын ортотугар туттарда.

Елена Голомарева нэһилиэкпит 95 сааһын туолар бэлиэ сылыгар, Сааскылаахха Өрөгөй ырыата аан бастаан сүрэхтэнэр күнүгэр биир хаан эбэҥки аймах дьоно төрүт омуктарын таҥаһын дьоһуннук кэтэн, сүргэлэрэ көтөҕүллэн туран ыллаабыттарыттан астынарын биллэрдэ. Ырыа ааптардарынан дьокутаат бэркэ билэр талааннаах айар куттаах дьоно, Анаабыр улууһун Бочуоттаах олохтооҕо, олохтоох бэйиэт Николай Туприн -Кэһиилээх уола уонна саха биллэр композитора Егор Неустроев-Тулуйхан буолаллар.

Сарсыныгар Елена Христофоровна  социология билимин дуоктара, психолог,биллиилээх уопсастыбанньык Ульяна Винокуровалыын «Влияние и роль архитектурно–пространственного развития наслега на духовно-нравственное здоровье населения» диэн төгүрүк остуолга кытыннылар. Хоту сиргэ тыын суолталаах боппуруостары таарыйар «төгүрүк остуол» нэһилиэк баһылыга Алексей Николаев көҕүлээһининэн ыытылынна. Манна олохтоохтор ыраас салгыннаах, кэрэ көстүүлээх айылҕаларын туонатыгар туспа анал түөлбэлэнэн кэтэх дьиэлэри туттан олоруохтарын баҕаралларын этиннилэр. Маныаха анал чөл олоҕу тутуһан спордунан дьарыктаналларыгар, сынньанар сир-уот боппуруоһун ырыттылар. Бу кэпсэтии түмүгүнэн Сааскылаах нэһилиэгин генеральнай былаанын саҥа сүүрээнин көрөн киллэрэргэ диэн быһаардылар.

Елена Христофоровна эдэр сааһыттан үчүгэйдик ыллыырын билэбит.  Саҥа дьыл кэлээри турдаҕына, кини айар куттаах доҕотторо Светлана, Егор Неустроевтар Анаабырга «Тулуйхан» студияларыгар ырыаҕа үөрэниэн баҕалаах оҕолору үөрэтэн отчуоттуур кэнсиэр туруордулар. Елена Христофоровна көрөөччүлэргэ бастаан, биһиги эбээлэрбит туундара киэн дуолугар ураһаҕа иистэнэ олорон истэригэр киҥинэйэн ыллыыр норуоттан кэлбит кэрэ матыыптарын иһитиннэрдэ. Бу кэнниттэн тапталлаах Өлөөнүн туһунан ырыатын ис дууһатыттан истиҥник толорон олохтоохтор биһирэбиллэрин ылла. Иккис күнүгэр улуус баһылыгар улуустааҕы хотугу норуоттар Ассоциацияларыттан, олохтоох аҕа ууһун общиналара, булчуттар мустан өбүгэ саҕаттан олохсуйбут төрүт сирдэрин-уоттарын көмүскүүр сокуоннары ыйыталастылар, күннээҕи үлэ-хамнас кыһалҕаларыгар тохтоон кэпсэттилэр, сүбэлэттилэр.

Салгыы норуот дьокутаата улуус баһылыгын планеркатыгар тэрилтэ салайааччыларыгар туһаайан тыл эттэ. Манна кини күһүн Владивостокка Илиҥҥи экономическай форумҥа төрүт хотугу омуктарга сыһыаннаах ханнык боппуруостары көрбүттэрин, туох саҥа сокуоннар ырытыллыбыттарын, норуот дьокутаатын быһыытынан ханнык федеральнай сокуоннарга үлэлэспитин кэпсээтэ. Кини маны таһынан, улуус баһылыгар Үрүҥ Хайаттан долган рок-музыкатын оонньуур «Элдэн» вокальнай инструментальнай бөлөҕү үрдүк таһымҥа таһааран илдьэ барарыгар көмөлөспүтүгэр махталын тиэртэ.

Елена Христофоровна «Абитуриент - 2022» ыстаапка ситиһиилээхтик үлэлээн  Анаабыртан 100 быр. абитуриены үөрэх кыһаларыгар сүүрэн-көтөн, тэҥҥэ үлэлэһэн киллэрбит Зинаида  Спиридонованы хайҕаата уонна улуус баһылыгын Эдуард Петрович тула мустан биир хамаанданан таһаарыылаахтык үлэлииллэригэр ыҥырда. Билигин дойдубутугар балаһыанньабыт уустугунан кэтэһиигэ олорорбутун санатта.

Көрсүһүүгэ оройуон дьокутааттарын Сугулаанын бэрэссэдээтэлэ Валентина Матвеева, Анаабыр норуоттарын Ассоциациятын бэрэссэдээтэлэ Мария Попова кэлэр сыллааҕы Ил Түмэн быыбарыгар норуотун туһугар бэйэтин харыстаммакка үгүс үтүмэн үлэни ыытар Елена Христофоровнаны өйүүллэрин биллэрдилэр. Кини ардыгар өйдөспөт буолууну, утарсыыны, үгүс уустуктары да көрүстэр, чаҕыйбакка хотугу норуотун дьылҕатын быһаарыыга хорсуннук киирсэрин, көдьүүстээхтик үлэлиирин бэлиэтээтилэр.

Бу курдук, норуот дьокутаата Елена Голомарева Сааскылаах саҥа гимнин тэҥҥэ долгуйа сүрэхтэһэн, аймахтыы сириттэн алгыстаах Анаабыртан саҥа сылга күүс-уох ылан, норуотун кытта бииргэтин биллэрэн, дьонун-сэргэтин кытта көрсөн  барбытыттан анаабырдар астыналларын биллэрдилэр.