Кириһиэнньэ иннинэ туох баар айыыгын-хараҕын, дьоҥҥо туох куһаҕаны оҥорбуккун барытын санаан туран, алҕаһаабыккын өйдөөн, сыыспыккын ис сүрэхтэн истиҥник билинэн, ол сүгэһэргиттэн босхолонуохтааххын. Иоанн Предтеча саҥа ыраас сырдык олоххо үктэниэн баҕалаах дьону айыыларын-хараларын билиммиттэрин кэннэ ууга үстэ чомполоон ылара. Онтон сиэттэрэн Кириһиэнньэ күн буруолаабытынан ойбоҥҥо киирэн үстэ умсан ылар үгэс олохтоммута.
Иисус Христоһу итэҕэйэр дьон кэнниттэн батыһан киирэн өрүскэ сүрэхтэнэр кэмнэригэр халлаан сиигэ арыллан, Сибэтиэй Троица: Таҥара Аҕата, Уола уонна Сибэтиэй Тыын көстүбүт. Үрүҥ холууп өрө көтөн тахсан: «Тапталлаах уолбун алгыыбын», — диэн саҥа иһиллибит. Ол иһин Кириһиэнньэ иккис аата — Таҥара илэ көстүүтэ.
Тохсунньу 18 күнүгэр Таҥара дьиэтигэр сарсыардааҥҥы уонна киэһээҥҥи литургия ыытыллар, ол кэнниттэн сибэтиэй ууну ылан, бэйэни, дьиэни ыраастаныахха сөп.
Ойбоҥҥо киирэн сөтүөлээн тахсыбыт киһи тута айыытыттан-харатыттан босхолонор диэн буолбатах, бастатан туран, куһаҕаны оҥорбуккун билиниэххин, инникитин ону хатылаабат курдук дьаһаныаххын наада диэн этэллэр Таҥара үлэһиттэрэ.
Дьокуускайга Күөх хонууга -50С хойуу туманынан будулуйар тохсунньу тоһуттар тымныытыттан толлубакка 2007с. сыл ахсын муустаах ууга умсар, билигин Санкт-Петербург куоракка олорор Ольга Хохлачева кыһын өрүскэ сөтүөлүү киирэр хайдаҕын туһунан кэпсээтэ.
«Аан бастаан ойбоҥҥо киирэн умсарбар эрдэттэн бэлэмнэммэтэҕим. Дьон умсар, мин эмиэ диэн көҕүйсэн киирбитим, ол эрээри, иккис сырыыбар муустаах ууга киирэр хайдаҕын билэр буолан, салла санаабытым. Таҥараттан көрдөһөн баран харахпын быһа симээт ыстанан кэбиспитим, тымныы киһи этин быһа тутар, ууттан тахсаат, хааным эргиирэ түргэтээн, сүрэҕим тибигирэччи тэбэн, эниэргийэ тута эбиллэ түспүтэ. Күрүлүүр күүс-уох, сэниэ киирэн, тугу барытын айыах-тутуох туруктанаҕын.
Тус бэйэм 2007с. Кириһиэнньэҕэ муустаах ууга сыл аайы умсабын, арай төрдүс оҕобун күүтэрбэр 2010с. тохтуу сылдьыбытым. Кыһын ойбоҥҥо сөтүөлүүрүм тухары биирдэ даҕаны тумуу да киирбэтэҕэ, хата атахпар өр оспокко сылдьыбыт баас тардыллан көрдөрбүтүнэн оһон хаалбыта.
Таһырдьа -35С, -55С этиҥ-сииниҥ ону араарбат. Санкт-Петербурга көһөн кэлиэхпиттэн бу дьарыкпын быраҕа иликпин. Дьокуускайга ойбон оттуллар сылаас балаакка иһигэр турар, оттон манна таһырдьа кытыл устун сүүрэн тиийэн ойбоҥҥо умсаҕын, инчэҕэй таҥастаах сытыы тыалга тахсаҕын. Онон тапталлаах Дьокуускайбар умсар ордук этэ», — диир кини.
Ольга Питергэ дьиэҕэ олорон суруйар үлэнэн дьарыктанар, видеолары, роликтары «саҥардар», элбэх сакаас киирэр буолан чуҥкуйбат. «Саамай сөбүлүүрүм диэн билигин дьиэ кэргэммин кытта бириэмэбин атаарабын, тимир көлөҕө олордубут да ханна баҕарар айанныыбыт, саҥа сири-дойдуну көрөбүт», — диэн кэпсээнин түмүктүүр.
Хаартыскаҕа: Ольга Хохлачева хаҥастан бастакы
-
0
-
0
-
0
-
0
-
0
-
0
