Кини этэринэн, үөрэнээччи таҥаһыгар үөрэх тэрилтэтэ ирдэбиллэри олохтуурун туһунан көҕүлээһин булгуччу сокуонунан бигэргэниэхтээх. - Оскуолаларга үөрэнээччи балахон, хайдыбыт джинсы ыстаан, о.д.а. араас таҥаһы кэтиэ суохтаах, - диэн кини бэлиэтиир.
Маны таһынан миниистири солбуйааччы маннык эбээһинэһи дойду 37 эрэгийиэнигэр олоххо киллэрэн, күн бүгүн ирдэбил быһыытынан буолбакка, оскуолаларга тутуһалларын кэпсээтэ. Ол эрээри, бу быраабыланы билиҥҥи сокуон хараҕынан, үөрэнээччи быраабын кэһэн туран, булгуччу тутуһарын ирдиир сатаммат. Итинэн сибээстээн, маннык сокуон барылын министиэристибэ бэрэстэбиитэллэрэ олоххо киллэрэргэ этии көтөхтүлэр.
Оттон Госдума сис кэмитиэтин чилиэнэ Анатолий Вассерман санаатынан, үөрэх тэрилтэлэрэ сиэри таһынан кытаанах ирдэбиллэри киллэриэхтэрэ диэн кутталы үөскэтэр.
- Эрэгийиэннэр таһымнарыгар үөрэнээччи таҥаһыгар-сабыгар уопсай ирдэбиллэри оҥоруохтара. Оттон оскуолаларга эрэгийиэн салалтата бигэргэппит ирдэбиллэрин толорорго дьулуһуохтара. Эрэгийиэннэринэн кэнэҕэски ирдэбиллэри олохтуохтара дии санаабаппын, - диэн Андрей Корнев быһаарар.
Үөрэҕирии миниистирэ Сергей Кравцов бэйэтин өттүттэн үөрэнээччилэр тас көрүҥнэрин бэрээдэктиир үрдүк суолталааҕын бэлиэтиир. – Быһаччы эттэххэ, хара бүрүүкэ, күөх ырбаахы ирдэниэхтээх, оттон таҥас хаачыстыбата - бу атын боппуруос, - диэн кини эбэн эттэ.
Госдума Үөрэҕириигэ сис кэмитиэтин бастакы солбуйааччы Алена Аршинова бу этиини өйөөтө. - Оскуолаҕа үөрэнээччи уопсай тас көрүҥэ ыйыллыахтаах, – диэн кини санаатын эттэ. Госдума дьокутаата Ольга Казакова министиэристибэ көҕүлээһинин дьүүллэһэргэ этии киллэрдэ уонна сокуон көҕүлээһинин оҥорон, Госдума көрүүтүгэр киллэрэллэригэр туһаайда.
Санаттахха, былырыын сэтинньи ыйтан дойду үрдүнэн оскуола таҥаһыгар (форматыгар) национальнай ыстандаарты (ГОСТ) оҥоруу саҕаламмыта. Докумуон бастакы эрэдээксийэтин быйыл бэс ыйыгар билиһиннэрэр былааннаахтар.
-
1
-
0
-
0
-
1
-
0
-
0
