"Устудьуоннар городоктара" диэн норуокка биллэр кыбаартал олохтоохторо 706 нүөмэрдээх учаастакка кэлэн куоластыахтаахтар. Бу учаастак “Сэргэлээх уоттара” култуурунай киин дьиэтигэр баар. Билигин манна куоластыыр учаастак бэрэссэдээтэлин солбуйааччы Айталина Григорьева уонна сэкирэтээр Татьяна Софронова бэлэмнэнии үлэтин тэрийэ сылдьаллар. Айталина Григорьева кэпсиир:
-- Биһиги бэс ыйын 16-21 күннэригэр пааспардарыгар бырапыыскаларынан баар учаастактарга буолбакка, кинилэргэ тоҕоостоох учаастактарга куоластыылларын биллэрэллэрин туһунан сайабылыанньалары хомуйбуппут. Биһиэхэ барыта 73 сайабылыанньа киирбитэ. Онтон бэс ыйын 21 күнүттэн бэс ыйын 24 күнүгэр диэри бэлэмнэнии үлэтэ күүскэ ыытыллар. Бэс ыйын 25 күнүгэр куоластааһын саҕаланар. Дьон биир күн тоҕуоруһан кэлбэтин диэн дойду үрдүнэн бэс ыйын 25-30 күннэрин куоластааһын күннэринэн, онтон от ыйын 1 күнүн куоластааһын күнүгэр куоластааһын диэн биллэрдилэр. Хас биирдии кэлбит киһи илиитин дезинфекцияланар, кинилэргэ мөһөөччүк биэрэбит, иһигэр мааска, бэрчээккэ, уруучука баар буолар. Илиибитинэн олох даҕайсыа суохтаахпыт. Куоластыы кэлбит киһи тэйиччи туран пааспарын арыйан көрдөрүөхтээх, испииһэккэ илии баттыахтаах.
Куоластыыр учаастак муостатыгар дьон бэйэ-бэйэлэриттэн 1,5 миэтэрэ тэйиччи туралларын курдук сурааһын тартыбыт. Биһиги бэс ыйын 25 күнүттэн иккилии буолан солбуйсан үлэлиэхтээхпит. Икки киһи сарсыардаттан күнүскэ диэри, икки киһи күнүстэн киэһээҥҥи диэри.
Биһиги бары быыбардыыр хамыыһыйаҕа үлэлииргэ көҥүллээх дьон үлэлии сылдьабыт. Бу көҥүл 5 сылга бэриллэр. Миигин уонна үс кэллиэгэбин ХИФУ кэлэктиибэ бу хамыыһыйаҕа түһэрбитэ. Бүгүн 3№-дээх поликлиника үлэһиттэрэ кэлэн учаастак хамыыһыйатын үлэһиттэриттэн анаалыс ылыахтаахтар. Биһиэхэ 14 чааска кэлэллэр. Куоластааһын күннэригэр хамыыһыйа үлэһиттэрэ анал көмүскэнэр көстүүмнээх, сирэйбитин сабар пленкалаах, бэрчээккэлээх үлэлиибит. Бу сириэстибэлэр барыта кэлбиттэрэ. Куоластааччыларга түҥэтэр сириэстибэлэрбитин эмиэ тиксэрдилэр.
-
0
-
0
-
0
-
0
-
0
-
0
