Өйдөбүнньүгү Нам нэһилиэгин «Көмүлүөк» түмсүүтэ, аймахтара үбүлээн туттардылар. Эдьиэй Морууса төрөөбүт-үөскээбит өтөҕөр Ыкынаачык Кыыкытыгар анал бэлиэ туруоруу туһунан Попова Елена Егоровна, Софронова Мария Семеновна этии киллэрэннэр, ону «Көмүлүөк» түмсүү уонна аймахтара өйөөннөр, Дьокуускай куоракка олорор быраата Николаев Валерий Васильевич, Нам олохтооҕо Гаврильев Геннадий Иванович, сиэн быраата Григорий Харлампьев матырыйаалын булан-талан, оҥорбуттар.
Өйдөбүнньүк турар сирин Нам, Балаҕаннаах нэһилиэктэрин, Үөһээ Бүлүү улууһун бочуоттаах олохтооҕо, Дьоруой Ийэ Попова Елена Егоровна талан бэлиэтээбит.
Мария Игнатьевнаҕа аналлаах бэлиэни арыйдылар: үлэ, тыыл бэтэрээннэрэ Попова Е. Е., Софронова М.С., Гаврильев Г.И., Харлампьев С.С. Эҕэрдэ тылы эттилэр: Нам, Балаҕаннаах нэһилиэктэрин баһылыктара Кардашевскай А.И., Дмитриев С.И., Саха народнай суруйааччыта Наумов Д.Ф., култуура үтүөлээх үлэһитэ Кардашевская А.А., сиэн быраата Харлампьев Г.С.
Бэлиэ аһыллыытыгар Нам нэһилиэгин «Көмүлүөк» түмсүүтэ, Нам уонна Балаҕаннаах нэһилиэктэрин олохтоохторо, улуус кииннэммит балыыһатын үлэһиттэрэ кыттыыны ыллылар.
Балыыһа кэлэктиибэ Мария Игнатьевна айбыт «Быраас барахсан» диэн ырыатын ыллаан мустубут дьону-сэргэни үөртүлэр.
Бэлиэ арыйыытын тэрээһинин Нам нэһилиэгин култууратын киинин үлэһитэ Саха өрөспүүбүлүкэтин култууратын туйгуна Марианна Долгунова олус үчүгэйдик иилээн-саҕалаан ыытта. Дьон-сэргэ бары даҕаны сэргэхсийэн, үөрэн -көтөн, дуоһуйа кэпсэтэн, саха дьонун сиэринэн быыппаҕынан, саламаатынан, алаадьынан күндүлэһэн, дьоһун дьоро киэһэни атаардылар.
- 1
- 0
- 0
- 0
- 0
- 0