Бастакы этээскэ ыалдьыттары сахалыы таҥастаах ыччаттар айхаллыы-арчылыы көрүстүлэр. Икки этээс фойетыгар С.А. Зверев-Кыыл Уолун аатынан Үҥкүү национальнай тыйаатырын «Кыл саха» аркыастыра оонньуур.
Саха Судаарыстыбаннаһын, Парламенын устуоруйатын сырдатар Национальнай библиотека уонна Ил Түмэн холбоһуктаах быыстапкалара тардыллыбыт. Ити барыта өрөгөйдөөх, киэн туттунуулаах санааны үөскэтэр.
-- Нөрүөн-нөргүй, үөрүүлээх мунньах кыттыылаахтара, ытыктабыллаах үтүө-мааны ыалдьыттар! Саха Өрөспүүбүлүкэтин Ил Түмэнин 30 сыллаах үбүлүөйүнэн итии-истиҥ эҕэрдэ! Барҕа быйаҥнаах Сахам дойдута, модун Арассыыйа киэн туттуута, өркөн өрөгөй тойугун туойдун, үүнэр үйэҕэ үрдүү турдун! – диэн диктор чоргуйар саҥата мунньах саҕаламмытын биллэрэр.
Үөрүүлээх мунньахха Ил Түмэн араас ыҥырыыларыгар норуот дьокутаатын мандаатын тутан үлэлээбит-хамсаабыт дьону сэргэ аппараат исписэлиистэрэ итиэннэ Парламент дьиэтэ ыраас, сылаас, тупсаҕай буоларын хааччыйбыт бэтэрээннэр биир кэмҥэ алтыһан үлэлээбит үөлээннээхтэрин көрсөн үөрдүлэр-көттүлэр.
Хараҕым үс («кырдьаҕас» диэҕи тыл тахсыбат) дьүөгэлиилэргэ хатанна. Кэпсэтэн билбитим, Парламент дьиэтигэр 1995-2021 сс. уборщицалаабыт Степанида Лугинова, 1998-2020 сс. гардеровщицалаабыт Октярина Парникова, уонтан тахса сыл устата сибэкки үүннэрээччинэн үлэлээбит Лия Ефимова эбиттэр.
– Биһиги Ил Түмэн дьиэтигэр үлэлээбиппит, дьокутааттар норуот талбыт дьоно диэх курдук, бары эйэҕэс-сайаҕас майгылаах, култуурунай уонна боростуой үлэ дьонун сыаналыыр-ытыктыыр этилэр. Билигин бочуоттаах сынньалаҥҥа тахсан олоробут, Парламент салалтата умнубат, бэтэрээн быһыытынан мэлдьи чиэстиир, бүгүн бу күндү ыалдьыт буолан кэллибит, өйдөбүнньүк бэлэх туттубут, – диэн кэпсээтилэр кинилэр.
Хаартыскаҕа Василий Кононов (Ил Түмэн) түһэриилэрэ
-
2
-
0
-
0
-
0
-
0
-
0
