Күн киһитэ көмүскэс, айыы киһитэ аһыныгас. Улуус уонна өрөспүүбүлүкэ тыатын хаһаайыстыбаларын тэрилтэлэрин салайааччылара, кэлэктииптэрэ биир идэлээхтэригэр көмөлөһөртөн туора турбаттар. Ол туһунан Бааһынай хаһаайыстыбалар уонна кэпэрэтииптэр өрөспүүбүлүкэтээҕи ассоциацияларын (АККОР) бэрэсидьиэнэ Александр Артемьев маннык этэр:
– Халаантан эмсэҕэлээбит дьоҥҥо 44 бааһынай хаһаайыстыба көмөлөһөргө бэлэмнэрин биллэрдилэр. Сүөһүлэрин былдьаппыттарга дьоҕус хаһаайыстыбалар ньирэйдэри, бөдөҥ хаһаайыстыбалар тиҥэһэ биэриэхпит дэстилэр, сорохтор хортуоппуй сиэмэтин уонна комбикуорум биэриэх буоллулар. Ити курдук ким тугу көмөлөһөр кыахтааҕын ааҕына-суоттана сылдьаллар.
Бастакынан көмөлөһөргө быһаарыммыт дьонтон биирдэстэрэ Кэбээйи улууһун Кэбээйи нэһилиэгин олохтооҕо, өрөспүүбүлүкэ биллиилээх пиэрмэрэ, «Ворошилов» бааһынай хаһаайыстыба баһылыга Аксинья Левина буолар. Кини Хатырык нэһилиэгэр 60 ньирэйи биэрэрин биллэрдэ, оттон Егор Левин биирдэм тэрилтэтэ аны күһүн икки биэни биэрэргэ быһаарда.
– Айгыраабыт хаһаайыстыбаны чөлүгэр түһэрэр хайдах курдук ыараханын биһиги бэркэ билэбит, онон маннык кэмҥэ бэйэ-бэйэҕэ көмөлөсүһэр наада, – дэһэллэр кинилэр. Бу туһунан Кэбээйи улууһун дьаһалтатын пресс-сулууспата иһитиннэрэр.
-
1
-
0
-
0
-
0
-
0
-
0
