РФ Үлэҕэ уонна социальнай харалтаҕа министиэристибэтин 327н №-дээх бирикээһинэн, мантан инньэ инбэлииттэр уонна тулаайах оҕолор ый аайы ылыахтаах харчыларыгар (ЕДВ) аны сайабылыанньаны биэрэргэ тиэтэйбэттэр, кинилэр оннуларыгар эрэгийиэннээҕи Биэнсийэ пуондатын исписэлиистэрэ тустаах докумуоннары толорон бэлэмниэхтэрэ. Улахан киһи эбэтэр оҕо доруобуйатын туругунан инбэлиит буоллаҕына, 10 күн иһинэн кинилэргэ ый аайы төлөнөр социальнай харчы (ЕДВ) ананар. Ол туһунан анал иһитиннэрии судаарыстыбаннай өҥөнү оҥоруу көмөтүнэн тус кэбиниэккэ кэлэр эбэтэр суотабай төлөпүөнүгэр анал смс-иһитиннэриини ыыталлар. Ыйдааҕы харчыны ылыыга инбэлииттэр уонна тулаайах оҕолор сайабылыанньаны биэриилэригэр судургутутуу тоҕо киирбитэ өйдөнөр. Ол курдук, федеральнай инбэлииттэр реестрдэригэр биир кэлим иһитиннэриини биэрэр оператор баар буолла. Бу операторга медицинскэй-социальнай бэрэбиэркэни оҥорор тэрилтэлэр, федеральнай министиэристибэлэр уонна эрэгийиэннээҕи, муниципальнай былаастар сүрүн иһитиннэриилэри быһалыы ыыталлар. Ити көмөтүнэн инбэлиитинэн көрүллэр биэнсийэ харчытын уонна анал социальнай төлөбүрдэр докумуоннарын онон-манан эргиппэккэ тута оҥоһуллар буолла. Тустаах киһи дьиэтигэр олорон эрэ судаарыстыбаннай портал көмөтүнэн РФ Биэнсийэҕэ пуондатыгар электроннай сайабылыанньаны эрэ ыытар, уоннааҕы сибидиэнньэни Биэнсийэ пуондата федеральнай реестртэн ылар. Санатар буоллахха, билигин инбэлиитинэһи туруоруу, быһаарыы медицинскэй тэрилтэ оҥорбут докумуонугар олоҕуран ыытыллар, ол эбэтэр кэтэхтэн диэн. Маннык быһаарыныы коронавирус дьаҥыттан сылтаан 2020 сылга кулун тутар 1 күнүттэн алтынньы 1 күнүгэр диэри ылыллыбыта.
-
0
-
0
-
0
-
0
-
0
-
0
