Аммаҕа, Муона чараҥар, Олоҥхо ыһыаҕа тэриллэр сиригэр, култуура уонна сынньалаҥ пааркатыгар, сиэр-туом ыытыллар түһүлгэтэ, Аал Луук Мас оҥоһуллан силиктэрин сиппиттэр. Улуустар, улуус нэһилиэктэрэ түһэр, тэрээһин ыытыллар ураһалара, балаҕаннара, ат сүүрдэр ипподром ыалдьыттары көрсөргө бэлэмнэр. Аһыыр сирдэр, сынньанар, олоҕу хааччыйар тиһик, атын да тутуулар- киин түһүлгэттэн арыый туора тураллар. Ыһыахха 35 улуустан барыта 15 тыһыынчаттан тахса ыалдьыт кэлэрэ былааннанар.
Бүгүн, бэс ыйын 19 күнүгэр, маҥнайгы тэрээһиннэр саҕаланнылар. Ф.Ф. Потапов аатынан норуот айымньытын дьиэтигэр күнүс 2 чаастан Амма улууһуттан төрүттээх худуоһунньуктар: Ньургуйаана Никифорова-Ойууна, Ульяна Нохсорова уонна Николай Рязанскай уус-уран быыстапкаларын арыллыыта буолла.
Худуоһунньук Николай Николаевич Рязанскай олоҥхо тиэмэтигэр композиция оҥорбутун туһунан маннык кэпсиир:
--Бу барыта тус туһунан хартыыналар буолбакка, бэйэ бэйэлэриттэн ситимнэнэн тахсар биир айымньы буолар. Ис хоһоонунан аллараа дойду абааһылара орто дойду олохтоохторун сордууллар. Онуоха Үрдүк айыылар дьону аһынан, үөһэттэн айыллыбыт бухатыыры ыыталлар. Кини хатыҥтан күн сиригэр төкүнүйэр. Орто дойдуга кэлэн кэрэ кыыһы таптыыр, онтукатын абааһылар уоран илдьэ бараллар. Тапталын көмүскээн абааһылары кытары аллараа дойдуга охсуһан кыайар, дьоллоох олох төннөр. Композициябын былырыын күһүн саҕалаабытым уонна бу ыһыах эрэ иннинэ бүтэрдим. Бэйэм оҕо сааспыттан уруһуйдуурбун сөбүлүүбүн. Живопись салаатыгар дьарыктаммытын 30 сыл буолла. Биэнсийэҕэ тахсан баран ыкса ылсан үлэлэһэбин.
Хаартыскаҕа ааптар түһэриилэрэ
-
2
-
0
-
0
-
0
-
0
-
1
