Уопсастыба

Дьокуускайдааҕы хочуоллары оҥорор собуот модифицированнай электроматасыыкыла “Тимир ат” диэн ааттаах.  “ Бу тиэхиньикэни 20 кырадыыс тымныыга, 100 км. чааска диэри түргэнник сүүрдүөххэ сөп. Конструкциятын уларытан, улаатыннаран, элбэҕи тиэйэр гына багажник эптибит, тула дуганан эргиирдээтибит. Уһуллар аккумулятордарынан биир сэрээтинэн 50-60 км. барыан сөп. Икки кэмпилиэктээх сэрээтинэн 100 км. барар ”, - диэн собуот дириэктэрэ Пуд Тимофеев салгыы биир оҥоһугу билиһиннэрэр. “Бу оһоххо аһылык бэлэмниигин. Маһынан, чоҕунан оттуллар. Ону таһынан 60 кв. м. дьиэни сылытарын ааһан, кини электрогенератор быһыытынан 50 ватт кыамталаах уоту биэрэр. Онон рацияны, төлөпүөнү, БПЛА батарыайаларын сэрээттиэххин сөп”.    

ЯК-14 диэн тиэхэньикэ саҥа айыллан оҥоһуллубут. Сэрии сэбин уонна бааһырбыттары таһыыга аналлаах. Куйаҕын оскуолка дьөлө көппөт, бааһырбыты быыһыырга бэйэтэ троһу быраҕар мэхэньиисимнээх.

- Саха Сирин маастардара 2 сыл устата Анал байыаннай дьайыыга уонна дойду аармыйатыгар анаан оҥорор сэптэрэ-сэбиргэллэрэ биһиги биир дойдулаах саллааттарбытыгар олус наадалаахтар. Маннык тэриллэри төһө кыалларынан элбэҕи уонна чэпчэкитик оҥорорго сорук турар, -диэн РФ Бэрэсэдьиэнигэр СӨ Бастайааннай бэрэстиибэтэлэ Андрей Федотов Кангалассы ТОР сылдьан бэлиэтээтэ.

Үөрэххэ  бастакы уочарат

Анал байыаннай дьайыы кыттыылаахтарыгар уонна кинилэр дьиэ кэргэттэригэр дойду үрдүк үөрэҕин кыһаларыгар туспа миэстэни тыырыахтара.

Ол курдук, уопсай көрүллүбүт миэстэттэн аччаабыта 10 бырыһыанын бу кэрискэҕэ киирсэр дьоҥҥо аныахтара. Бу туһунан СӨ Үөрэҕириигэ уонна билимҥэ миниистирэ Нюргуна Соколова анал брифинг кэмигэр иһитиннэрдэ. Бакалавр уонна специалитет көрүҥэр быһа киириэххэ сөп диэн миниистир бэлиэтээтэ. Оттон орто үөрэх кыһаларыгар байыастары уонна кинилэр оҕолорун эксээмэн түмүгүн көрбөккө бастакы уочарат үөрэххэ ылаллар.

Байыас төрөппүтүгэр босхо

Анал байыаннай дьайыы кыттыылаахтарын дьиэ кэргэттэрэ, барыта 100-тэн тахса ыал, олорор дьиэтигэр гааһы киллэрэргэ матырыйаалынай көмөнү тутта.

Байыастар төрөппүттэрэ, 300-тэн тахса киһи, анал өйөбүлүнэн сонотуоруйга, куруорка эмтэннэ. 700 байыас уонна кинилэр чугас дьонноро доруобуйаны чөлүгэр түһэрэр тэрээһиҥҥэ сырыттылар. 240 киһи социальнай, мэдиссиинэ өҥөтүн туһанна. Кэлэр ыйтан элбэх оҕолоох байыас дьиэ кэргэнэ, байыаннай дьайыы бэтэрээннэрэ, инбэлииттэр уо.д.атыттар хомунаалынай өҥө төлөбүрүгэр чэпчэтиинэн туһаныахтара.

Сонотуоруйга уонна куруортарга эмтэнэ барыыга  Анал байыаннай дьайыы кыттыылаахтарын төрөппүттэригэр эрэгийиэннээҕи көмө диэн баарын санатыахха сөп. Ол курдук, усулуобуйа быһыытынан сонотуоруй Арассыыйа иһигэр баар буолуохтаах, 3 сылга биирдэ туһаныахха сөп, эмтэнии уһуна 14 хонук. Путевка сыаната 100 %  төннөрүллэр, ол гынан баран, 60 тыһ. солк. иһинэн. Төлөбүрү икки көрүҥүнэн ылыахха сөп: 1. Абаансанан (путевка 80 %, эбэтэр 48 000 солк.) Бүтэһик суумата эмтэниини ааһан баран, бары докумуоннары туттардаххына бэриллэр. 2. Эмтэниини толору барбытын кэннэ бэриллэр.

Эмтэнии өҥөтүнэн туһанарга бу ссыылканан киирэҕит: https://eyakutia.ru/#/shortCard/14000096.

Байыастарга анал нобуор

Саха Сиринээҕи Тутуу уонна дьиэни кэтээн көрүү управлениетын үлэһиттэрэ  Саха-Кэриэй оскуолатын  «Лингва+» сайыҥҥы лааҕырын үөрэнээччилэригэр аармыйаҕа «сухой душ» оҥоруутугар маастар-кылаас ыыттылар.

Оҕолор «душ» оҥоруутун бары түһүмэҕэр үөрэннилэр: анал сириэстибэҕэ таҥаһы быһан угуу, зип-бакыакка хаалааһын. Хас да бөлөххө арахсан үлэлээтилэр. Ким эрэ сымнаҕас дорнит быста, атыттар ону анал гелинэн толордулар, үһүстэр биирдэ туттуллар соттордору, дууһу хайдах туттар туһунан инструкциялары хахтаатылар. «Былааммытынан тыһыынча гигиена нобуорун оҥоруохтаахпыт, салгыы инники кирбиигэ сылдьар биир дойдулаахтарбытыгар ыытыахпыт. Байыастарбытыгар туһалаах буолуо дии саныыбыт», — диэтэ лааҕыр салайааччыта Сергей Гронин.Эрдэ управление «Биир ньыгыл Россия» баартыйа «Молодая гвардия»  эрэгийиэннээҕи ыстаабын кытта Анал байыаннай дьайыыга 5 тыһыынча маннык нобуору оҥорон ыыппыта.

«Сухой душ» оҥоруутугар анал күүгэн туттуллар, бу тириини дезинфекциялыыр, бааһы үтүөрдэр. Билигин биһиги саллааттарбыт сылдьар усулуобуйаларыгар олус көмөлөөх буолуоҕа», – диэтэ управление салайааччыта Павел Аргунов.

«Сдай ружье на СВО» диэн аахсыйа биллэрилиннэ

Бэс ыйын 24 күнүгэр «Биир ньыгыл Арассыыйа» баартыйа Саха Сиринээҕи салаата Илиҥҥи байыаннай уокуругу кытары «Сдай ружье на СВО» диэн аахсыйаны үлэлэтэн саҕалаата. «Бу аахсыйа баартыйа Саха Сиринээҕи салаатын көҕүлээһинэ буолар. Манна дьон-сэргэ кылааккай (гладкоствольное) уостаах сааны РФ Оборуонаҕа министиэристибэтин туһатыгар туттарар. Саха Сириттэн Анал байыаннай дьайыыга сулууспалыыр уолаттарга саалары тиксэриэхтэрэ», – диэтэ баартыйа салаатын салайааччыта Сулустаан Заболоцкай. 

Дьокуускай куорат Дууматын бэрэссэдээтэлэ Альберт Семенов булт саата дроннары утары бэрт көдьүүстэхтэрин бэлиэҕэ ылан,  бэйэтин саатын аахсыйаҕа туттарда. “Саа салгыы Анал байыаннай дьайыы буола турар сиригэр барыаҕа. Доруобунан ытар булт саата байыастарга наада. Сэрии хаамыытынан, кимэн киириигэ, оборуонаҕа даҕаны  аныгы технологиялар туттуллаллар. Онно бу доруоп саа  утарылаһааччылар пилота суох көтөр аппарааттарын суулларыыга ордук табыгастааҕын көрдөрбүт. Аахсыйаны баартыйа  салаата тэрийэн, олус туһалаах уонна көдьүүстээх дьаһал. Маннык сэп-сэбиргэл наадатын туһунан  байыастар бэйэлэрэ эппиттэрэ. Дрону суулларарга олус табыгастааҕын быһаарбыттара. Байыастар эппиттэринэн, биир саа уон олоҕу быыһыыр кыахтаах. Саха Сирин олохтоохторо биир дойдулаахтарын өйүүллэригэр эрэллээхпин”, — диэтэ Альберт Семенов. Ол курдук, аахсыйа кэмигэр, бэс ыйын 24 күнүттэн от ыйын 7 күнүгэр диэри Дьокуускай к., Дзержинскай уул. 35/1 дь. 14.00-17.00 ч ким баҕалаах 12 калибрдаах кылааккай (гладкоствольное) уостаах сааны туттарыан сөп. Пааспар, саа, саа-сэп көҥүлэ ирдэнэр. Саа чохуоллаах буолуохтаах.