Уопсастыба

Өрөспүүбүлүкэ олохтоохторугар киэҥник биллэр «Аврора» мэдиссиинэ килииникэтэ бу дэкээдэҕэ кыттыһан анал аахсыйалары, тэрээһиннэри ыытар. Аҥаардас Дьокуускай куоратынан эрэ муҥардаммакка, улуустары кытары үлэ хайысхатынан аҕам саастаахтар доруобуйаларын тупсарыыга туһуламмыт хас да хайысхалаах үлэни ыытар.
Бэҕэһээ, алтынньы 11 күнүгэр «авроралар» Горнай улууһун Бэрдьигэстээҕэр анал десанынан, улуус аҕам саастаахтарыгар бэрт сэргэх тэрээһини ыыттылар.Бу десаҥҥа быраастар уонна килииникэ иһинэн тэриллэн үлэлиир Уһун үйэлэнии киинин исписэлиистэрэ киирэн, ити күн 12 чаааһыттан саҕалаан дьону көрсөн, доруобуйаларын көрөн-истэн, хас биирдиилэрин кытта туһунан кэпсэтэн, консультациялары биэрдилэр, килииникэ үлэтин билиһиннэрдилэр.

Тэрээһин Бэрдьигэстээхтээҕи Духуобунас киинигэр, биллиилээх суруйааччы Петр Аввакумов аатынан улуустааҕы бибилэтиэкэ киэҥ саалатыгар хас да түһүмэҕинэн барда. Бастатан туран, «Аврора» десаныгар кыттыспыт быраастар: невролог-гериатр Полина Ивановна Кудрина, ревматолог Наталья Ивановна Трофимова уонна биэлсэр Жюлиана Олеговна Жиркова кэлбит элбэх аҕам саастаах дьон доруобуйаларын бэркэ кичэйэн көрдүлэр-иһиттилэр, ыарыыларын сүрүн көрдөрүүлэринэн сөптөөх рекомендациялары, салгыы хайдах эмтэнэр туһунан быһааран биэрдилэр. Оттон десант бөлөҕүн салайан кэлбит, «Аврора» килииникэ дириэктэрин эбээһинэһин толорооччу Вера Дмитриевна Никифорова, килииникэ иһинэн Уһун үйэлэнии киинин сэбиэдиссэйэ Вероника Александровна Макарова үлэлэрин бэрээдэгинэн, бэрт үгүс кэпсэтиини ыыттылар. Онно хас биир Кииҥҥэ кэлбит киһи салгыы хайдах гынан эмтэнэрин, сынньалаҥы барыан сөбүн кэпсээн, көрдөрөн, быһааран биэрдилэр. Быһатынан, бу хайысханан «Аврора» туох-ханнык үлэни, тэрээһини ыытарын чопчулаан, боппуруостары быһаардылар.

Аҕам саастаахтар улахан сэҥээриилэрин килииникэ Уһун үйэлэнии киинин иһинэн эмтэниини уонна сынньалаҥы бииргэ дьүөрэлээн ыытар үлэтэ ылла. Холобур, Киин номнуо саҥа таһымҥа тахсан, былырыҥҥыттан саҕалаан, Дьокуускайы таһынан, Хаҥалас улууһун Булгунньахтааҕар, оттон быйылгыттан Улахан Ааныгар филиаллары аһан үлэлэттэ. Быйыл алтынньы, сэтинньи ыйдарга Дьокуускайга уонна Булгунньахтаахха эмтэниини барарга 10 хонуктаах чэпчэтиилээх аахсыйаларыгар элбэх киһи суруйтарда. Дьон килииникэ доруобуйаны бөҕөргөтөргө табыгастаах усулуобуйатын сөбүлээбиттэрин бэлиэтиэххэ сөп.

Килииникэ бөлөҕүн биир улахан соругунан Горнай улууһун дьаһалтатын, олохтоох салайыныы уорганнарын уонна социальнай сулууспатын кытары бииргэ үлэлээһини олохтооһун, сайыннарыы өртүнэн үлэни ыытыылара буолла. Ол курдук, бу киэҥ бырагыраамалаах аахсыйа кэмигэр «төгүрүк остуол» тэрилиннэ, мустубут аҕам саастаах дьоннор итии чэйдээх остуол тула олорон, килииникэ уонна Горнай улууһун дьаһалтатын үлэлэрин-хамнастарын туһунан иһиттилэр, мунаарар ыйытыыларыар толору хоруйу ылан астыннылар.

Тэрээһин биир улахан, уопсастыбаннай суолталаах түгэнинэн «Аврора» уонна Горнай улууһун дьаһалтатын икки ардыларыгар бииргэ үлэлээһин туһунан Сөбүлэһиини түһэрсэр үөрүүлээх сиэрэ-туома буолла. Бу Сөбүлэһиини «Аврора» килииникэ дириэктэрин э.т. В.Д. Никифорова уонна «Горнай улууһа» МТ дьаһалтатын баһылыгын э.т. С.С. Стручкова илии баттаатылар.

Уһун үйэлэнии киинэ 2019 сылтан «Аврора» мэдиссиинэ килииникэтин иһинэн тэриллибитэ уонна бу сылларга Саха дьонун ортотугар киэҥ сэҥээрини ылан эрэр. СӨ Үлэҕэ уонна социальнай сайдыыга министиэристибэтин өйөбүлүнэн, аҕам саастаахтарга социальнай өҥөлөрүнэн туһанар кыаҕы  биэрэр. Саҥаттан саҥа хайысхалары киллэрэн билиҥҥи олоххо сөп түбэһиннэрэр, эмтэнэр, сынньанар дьоҥҥо табыгастаах формалары тутуһар.