Киин куоракка тэриллибит дьаһалга өрөспүүбүлүкэ Бырабыыталыстыбатын Бэрэссэдээтэлэ Кирилл Бычков эҕэрдэ тылын этэригэр бу күн ураты суолтатын тоһоҕолоон бэлиэтээтэ:
– Биһиги устуоруйабыт кыайыыларынан баай, ол эрээри, төһө бигэ туруктаахпытын тургутуулар салҕана тураллар. Арассыыйа күүһэ – биир дьиэ кэргэн курдук иллээхтик олорор норуоттарыгар, кинилэр сомоҕолоһууларыгар, уопсай устуоруйаларыгар, духуобунай-нравственнай сыаннастарыгар буолар. Биһиги бииргэбит. Саха Өрөспүүбүлүкэтэ кыайыыга сүҥкэн кылаатын киллэрэр: Анал байыаннай дьайыыга уолаттарбыт Ийэ дойдуну көмүскүүллэр, кинилэри биһиги бары өттүнэн өйүүбүт. Ити биһиги сомоҕолоһуубут күүһэ буолар.
Илиҥҥи байыаннай уокурук командующайын байыаннай-политическай үлэҕэ солбуйааччы – РФ Сэбилэниилээх күүстэрин байыаннай-политическай управлениетын начаалынньыга генерал-лейтенант Роман Греков Саха Сириттэн Анал байыаннай дьайыыга сылдьар байыастар хорсун быһыыларын сыаналыырын биллэрдэ.
– Тоҕус киһи Арассыыйа Дьоруойун аатын ылла, үгүстэр уордьаннарынан, мэтээллэринэн наҕараадаланнылар. АБДь-га сылдьар байыастарга өйөбүлүн иһин өрөспүүбүлүкэ салалтатыгар махтанабыт. Бу кэм устатыгар бииргэ үлэлээн кэллибит. Ил Дархан Айсен Николаевы, РФ Бэрэсидьиэнигэр бастайаанай бэрэстэбиитэл Андрей Федотову, Бырабыыталыстыба Бэрэссэдээтэлэ Кирилл Бычкову кытары араас боппуруостарга, ол иһигэр социальнай өйөбүлгэ тиийэ, бииргэ үлэлиибит. Эһиги ыытар аадырыстаах баһыылкаларгыт, гуманитарнай көмөҕүт, волонтёрдлуу хамсааһыҥҥыт сыаната биллибэт. Биһиги кыайыахпыт, сайдыыга хардыылаан иһиэхпит. Биһиги сомоҕолоһуубут суолтата итиннэ, – диэтэ, бойобуой сорудаҕы толорууга хорсун быһыыларын көрдөрбүт байыаннай сулууспалаахтарга «Бойобуой үтүөлэрин иһин» мэтээллэри туттарда.
Ыччат дьыалатыгар уонна социальнай коммуникацияларга миниистир э.т. Арассыыйа Дьоруойа Игорь Юргин сомоҕолоһуу күнүн суолтатын бэлиэтээтэ, 1612 с. тастан өтөн киирбит өстөөҕү утары охсуһууга Кузьма Минин уонна Дмитрий Пожарскай норуоту биир ньыгыл күүскэ түмэннэр, Москубаны быыһаабыттара, кыайыыны ситиспиттэрэ диэтэ.
Үөрүүлээх киэһэни Илиҥҥи байыаннай уокурук «МыЕстьМы» вокальнай-инструментальнай ансаамбылын тэттик кэнсиэрдэ түмүктээтэ диэн Ил Дархан уонна Бырабыыталыстыба пресс-сулууспата иһитиннэрэр.
Хаартыскаҕа Андрей Сорокин (ЯСИА) түһэриитэ
-
0
-
0
-
0
-
0
-
0
-
0
