Бу хамсааһын чэрчитинэн тыа сиригэр 50-ҥа диэри миэстэлээх уһуйаан, 60-ҥа диэри миэстэлээх дьоҕус оскуола, 70-ҥа диэри миэстэлээх оскуола-саад дьиэлэрэ, успуорт, култуура уонна доруобуйа харыстабылын эбийиэктэрэ, эдэр исписэлиистир олорор дьиэлэрэ тутуллаллар, ат сүүрдэр ипподромнар, Олоҥхо ыһыаҕын эбийиэктэрэ оҥоһуллаллар.
«Мин Сахам Сирэ XXI үйэҕэ» өрөспүүбүлүкэтээҕи Үтүө дьыала хамсааһын 25 сылын туоларынан, Ил Дархан Айсен Николаев дьаһалынан, анал кэмитиэт тэриллэн үлэлии-хамсыы сылдьар.
Үбүлүөй дьаһалларын чэрчитинэн, элбэхтэн аҕыйаҕы холобурдаатахха, сэтинньи 22 күнүгэр «Ил Түмэн» издательскай дьиэни кытары «төгүрүк остуол» тэриллибитэ. Онно норуот дьокутааттара, биэдэмистибэлэр салайааччылара, эппиэттээх үлэһиттэрэ, улуустар, нэһилиэктэр баһылыктара мустаннар, Үтүө дьыала хамсааһынын дьаһалларын олоххо киллэрии ырычаахтарын тупсарыыга санаа атастаспыттара. Кэккэ этиилэри киллэрбиттэрэ.
Сэтинньи 29 күнүгэр Мэҥэ Хаҥалас Өлөчөйүгэр Култуура дьиэтин аһыллыыта буолла. Сыл бүтүөр диэри өссө хас да тэрээһин ыытыллара, ол иһигэр, хамсааһын бэтэрээннэрин ахтыыларын кинигэтин биһирэмэ былааннанар.
Санатан эттэххэ, Үтүө дьыала хамсааһына 1999 с. Мэҥэ Хаҥалас улууһун дьаһалтатын көҕүлээһинэн, Бэрэсидьиэн Михаил Николаев өйөбүлүнэн саҕаламмыта. Бу ааспыт 25 сыл устата 1 200 эбийиэк, ол иһигэр 129 уһуйаан, 42 оскуола, 15 оскуола-саад дьиэлэрэ, 109 үөрэхтээһин, 274 култуура, 81 доруобуйа харыстабылын, 189 успуорт араас эбийиэктэрэ, эдэр исписэлиистэргэ анаммыт 142 олорор дьиэ уо.д.а. тутулуннулар.
2020 сылтан хамсааһын «Тыа сирин территорияларын кэлимник сайыннарыы» сударыстыбаннай бырагыраамаҕа киллэриллибитэ, онон бырайыактар өрөспүүбүлүкэ Бырабыыталыстыбатын, муниципалитеттар бииргэ үлэлээһиннэринэн уонна нэһилиэнньэ кыттыытынан олоххо киллэриллэллэр диэн Ил Дархан уонна Бырабыыталыстыба пресс-киинэ иһитиннэрэр.
Хаартыскалар Тутуу министиэристибэтин саайтыттан.
-
0
-
0
-
0
-
0
-
0
-
0
