«Көҥүл тустуу, биллэн туран, өрөспүүбүлүкэҕэ улуу үгэстэрдээх успуорт бастакы көрүҥүнэн буолар. Ол эрээри, инники сайдыытыгар элбэх кэлим боппуруостар бааллар. Бу үрдүкү ситиһиилээх успуорка эрэ буолбакка, тустуу уопсай сайдыытыгар сыһыаннаах, көҥүл тустууну сэргэ классическай, итиэннэ дьахтар тустуутун эмиэ таарыйар. Бары хайысхалары өйүөххэ наада», – диэтэ Айсен Николаев.
Бырагырааманы олоххо киллэрии икки түһүмэхтээх. Ол курдук, бастакы түһүмэх 2025-2028 сыллары хабар, онтон иккис түһүмэх 2029-2032 сыллаах болдьохтоох.
Тустуунан дьарыктанар оҕолору киэҥник хабар инниттэн успуорка бэлэмниир эбии үөрэх бырагыраамаларынан үлэлиир тэрилтэлэргэ тустуу салааларын улаатыннарары былаанныыллар.
Өрөспүүбүлүкэҕэ күрэхтэһиилэри бэрээдэктииргэ уонна саҥа халыыбынан ыытарга, успуорт инвентарынан хааччыйыыны күүһүрдэргэ, атын эрэгийиэннэртэн идэтийбит тренер-сүбэһиттэри ыҥырарга эттилэр.
Дьүүллэһии түмүгэр Айсен Николаев бырагыраама барылын ситэрэргэ сорудахтаата, итиэннэ сөбүлэҥҥэ уонна бигэргэтиигэ киллэрэргэ эттэ.
Ил Дархан Дьокуускайга норуоттар икки ардыларынааҕы турнирдары ыытыы кыраапыгын, итиэннэ маннык таһымнаах күрэхтэһиилэргэ өрөспүүбүлүкэ тас өттүгэр спортсменнар кыттыыларын чопчулуурга сорудах биэрдэ.
Маны сэргэ, эппиэттээх министиэристибэлэргэ уонна биэдэмэстибэлэргэ 2027 сылга Дьокуускай куоракка спортивнай тустууга Арассыыйа чемпионатын тэрийэргэ уонна ыытарга этиилэри киллэрэргэ ыйда.
Айсен Николаев тустууктары эрчийиигэ аныгы технологиялары туһаныыны, ол иһигэр спортсменнары бэлэмнээһиҥҥэ ускуустубаннай өйү киллэриини күүһүрдэр наадатын бэлиэтээтэ.
СӨ физическэй култуураҕа уонна успуорка министиэристибэтин дааннайдарынан, тустуу 123 тренер салалтатынан 31 муниципальнай оройуоҥҥа сайдар. Тустуунан дьарыктанар киһи уопсай ахсаана 8 тыһыынчаттан тахса, олортон 6 тыһыынчаттан тахса оскуола саастаах оҕолор. Бүгүҥҥү күҥҥэ Арассыыйа көҥүл тустууга федерациятын спортивнай хамаандаларын састаабыгар өрөспүүбүлүкэ 25 спортсмена киирэр. Кинилэртэн 6 кыргыттар уонна уолаттар, 11 юниордар, 8 улахан дьон буолаллар. Сылын ахсын өрөспүүбүлүкэҕэ тустууга 30 официальнай уонна 100-тэн тахса улуус күрэхтэһиилэрэ ыытыллаллар.
СӨ Ил Дарханын уонна Бырабыыталыстыбатын пресс-сулууспата
Хаартыска: Андрей Сорокин, ЯСИА
-
0
-
0
-
0
-
0
-
0
-
0
