Түмэл дириэктэринэн Валерий Пантелеймонович Кочнев, сүрүн методиһынан Валерий Фомич Уаров, экскурсовод-методиһынан Анна Алексеевна бу соторутааҥҥа диэри үлэлээбиттэрэ. Билигин успуорт түмэлин дириэктэринэн ССРС, РСФСР, Саха АССР үтүөлээх тренерэ Д.П. Коркин иитиллээччитэ, ССРС успуордун маастара Михаил Егорович Друзьянов үлэлиир. Өрөспүүбүлүкэ үрдүнэн успуорка аналлаах 13 түмэл, олор истэригэр, Чурапчыга (Пудов Е.В.), Майаҕа (Илларионов А.П.), Дьааҥы Баатаҕайыгар (Портнягин П.В.), Уус Алдан улууһун Баатаҕайыгар, Горнай улууһун Бэрдьигэстээҕэр, Николай Захаров-Сахаачча аатынан Аммаҕа, Бүлүү бөлөх улуустарга Ньурба Убайааныгар, Дьокуускайга Р.М. Дмитриев аатынан Олимпийскай эрэл училищетыгар (Константинов Н.Н.) биллэр-көстөр түмэллэр бааллар. “Триумф” успуорт уораҕайыгар Монреаллааҕы Олимпийскай оонньуулар көҥүл тустууга чөмпүйүөнэ, аан дойду үс төгүллээх, Европа, ССРС чөмпүйүөнэ, ССРС успуордун үтүөлээх маастара Павел Павлович Пинигин үлэлиир кабиниэтигэр аатырбыт бөҕөс кыайыыларын уонна кини төрөппүт аҕатын, фронтовик-буойун Павел Титович Пинигин бойобуой наҕараадаларын көрдөрөр түмэл оҥоһуллан үлэтин саҕалаата.
Физкултуура уонна успуорт 100 сылларынан Саха Сирин успуордун устуоруйатын уонна успуорт ситиһиилэрин кэпсиир-көрдөрөр быыстапка Москваҕа Успуорт министиэристибэтигэр туруоруллан улахан сэҥээриини ылла. 24 тыһ. киһи, о.и. омуктар сөҕүүлэринэн-махтайыыларынан туһанар. Оҕо успуордуттан, “Азия оҕолорун” оонньууларыттан саҕалаан успуорт төрүт көрүҥнэрин, нэһилиэнньэ киэҥ араҥатын хабар маассабай успуорду тэҥэ, успуорт үрдүкү чыпчаалын -- Олимпийскай оонньуулары киэҥник сиһилии сырдатар тустаах түмүллэр атын эрэгийиэннэргэ тарбахха баттаналлар. Онон, Сахабыт Сирэ бастыҥ спортивнай эрэгийиэнин буоларын арылхай көстүүтүнэн, СӨ успуорка миниистирэ Л.Н. Спиридонов Бүтүн Арассыыйатааҕы “SportsFaciliies-2025” судаарыстыбаннай бириэмийэни ылан кэлбитэ оруннаах, түбэспиччэ буолбатах.
2016 с. миниистир Г.Р. Балакшин бирикээһинэн СӨ успуорка түмэллэрин Сэбиэтэ тэриллибитэ. Бэрэссэдээтэлинэн Михаил Егорович Друзьянов, эппиэттээх сэкирэтээринэн Анна Ивановна Петрова анаммыттара. Михаил Егорович этэринэн, түмэл аныгылыы ньыманан тупсарыллыахтаах, саҥа эспэнээттэринэн байытыллыахтаах. Интерактивнай, электроннай систиэмэтэ баар буолуоҕа. Успуорт түмэллэрэ сайдар кэскиллээхтэр.
Ааптар хаартыскаҕа түһэриилэрэ.
-
0
-
0
-
0
-
0
-
0
-
0
