Уопсастыба

Таҥара табатын курдук симэнэн тахсан, Валентина Тихонова уонна бырайыак кыттыгас ааптара Людмила Попова эҕэрдэ эттилэр. Өрөспүүбүлүкэҕэ биир бастыҥ үлэлээх «Алмазкредитсервис» Сунтаардааҕы салаа салайааччыта Л. Варламоваҕа эҕэрдэ сурук туттардылар.

Хампаанньа төрүттээччитэ Татьяна Варфоломеева кыым саҕан, дьиҥ суруллубут монографияҕа олоҕуран, күн дьоно сахалар хайдах күһүнү өксүөнүнэн, кыһыны кырыатынан билэн, араас моһоллору туораан, дьиикэй кыыллары дьиэтитэн сүөһү төрдө оҥостубуттарын илэ курдук көрдүбүт. Саха сирин бараммат баайа, талыыта-талбата олоҕу чэчирэппитин хоһуйдулар. Дьөһөгөй оҕото барахсан барылаччы кистээн олох уйгута буоларын өссө төгүл итэҕэттилэр. Сороҕор төһө да хонууттан хомуллан, сыһыыттан сылгыланан кыыс оҕо хотун ойох буолан олоҕу салгыыыра, дьиҥнээх эр киһи дьахтарга харыстабыллаах сыһыана долгутта. «Аан дойду киэргэлэ – кыыс» диэбиттэрэ хайдах курдук дириҥ суолталааҕый? Сиргэ олох туругурарын үс араас сэргэнэн көрдөрдүлэр. Көрөн олорон олох сэргэтин өрө астыбыт, сэлэ чэчир тартыбыт, уйгу-быйаҥ чороонун күөрэччи көтөхтүбүт. Урут кыһалҕаттан дьахтар эр киһини кытта тэҥҥэ сэрииһит эбит. Кэлин ол киэргэлгэ симэххэ кубулуйбутун илэ көрдүбүт. Хоҥкунуур тыллаах этигэн хомуспут тыһыынчанан сыллар анараа өттүлэригэр ойуун тэрилэ эбит. Ол да иһин билигин даҕаны хомус дьүрүскэн тыаһынан эмтэнэбит, ыраастанабыт. Түптэ уматыы, кымыс иһиитин сиэрэ-туома Сунтаарга киэҥник ыытыллар буолан бары да үчүгэйдик билэбит. Онтон Саха сирин Дархан оһуокайдьыта, баар-суох алгысчыппыт Кураһаай Мэхээлэ таҕыста эбээт. Тилэхпиттэн уу дьулайбар диэри дьырылаан киириэр, үөһэ өндөйүөхпэр диэри алгыс түһэрдэ. Тоҕо эрэ, тоҕо эрэ бу алгыһы хас биирдии киһи тус киниэхэ эрэ анаммытын курдук ылыммыта буолуо диэн санаа киирдэ, мин оннук ылынным, олус чэпчээтим.
Мин бу туруорууну көрөн олорон, өрөспүүбүлүкэҕэ биир бастыҥ үлэлээх бааммыт дьонноро үлэлээбэккэ үҥкүүнэн эрэ үлүһүйбүттэр диэх курдук, бэркэ үҥкүүлүүллэрэ сөхтөрдө. Үҥкүү тыйаатырын артыыһа Эдуард Жирков, «Гулун» ансаамбыл үҥкүүһүттэрин мин муусука оскуолатыгар өр сылларга үлэлээбит буолан, элбэх үҥкүүһүтү көрбүт эрэ буолан араардым, омуннуу соҕус эттэххэ. Оннооҕор үрдүлэригэр мас да суулуннаҕына тостуо суох курдук толуу буойуттар үҥкүүгэ ох сааларынан үөһэ-аллара, уҥа-хаҥас хайыһыннаран үҥкүүнү бэркэ ситэрдилэр, сүрүн үҥкүүһүттэр курдук көһүннүлэр. Көстүүмнэри тикпит көмүс тарбахтаахтарга туспа махтал. Хаартыскаҕа түһэ сылдьан уора-көстө көрдүм. Бу ырыаһыттарын, хас да куолаһынан дьүрүһүтүү. Устудьуон оҕолору хайҕыаҕы тыл тиийбэт. Бүтэһигэр сиргэ олох чэчириирин туоһутугар оһуокайдаан ойдубут.
Күн дьонноро биһиги олорон кэлбит олохпутун барытын хаптылар, олус дириҥ ис хоһоонноон туруорбут режиссер Наталья Кралинаҕа, артыыстарга махтал. Бу бырагырааманан өссө киэҥ сири, элбэх дьону хабыахха наада эбит. Элбэҕи көрөр-билэр, кыттар Сунтаар дьонун хараҕын толордугут, дууһатын кылын таарыйдыгыт, тугу эрэйбитин биэрдигит. Махтал!

Зинаида Федотова -Дьол Кыыма