Уопсастыба

Кэмпириэнсийэҕэ дойду 70 эрэгийиэниттэн араас омук оҕолоро мустан, чинчийбит үлэлэрин сүрдээх ирдэбиллээх дьүүллүүр сүбэ иннигэр көмүскээтилэр. Сайаара Ушницкая  нуучча тылын учуутала Эмма Хрисанфовна Кашкина салайыытынан, «Тайны Пушкинского слога» диэн тиэмэҕэ улуу Александр Пушкин киэҥник биллибэтэх, ситэриллибэтэх, кини өлбүтүн кэннэ булуллан бэчээккэ тахсыбыт «Сказка о медведихе» диэн остуоруйатын тылын-өһүн, ис тутулун, билиҥҥи кэми кытта сибээһин чинчийбитэ, ону таһынан бу остуоруйанан түөрт көрүҥ айар үлэни толорбута улахан болҕомтону тарта. Бу үгүс таайтарыылаах остуоруйа оскуола бырагырааматыгар суох, учуутал кылаас таһынан ааҕыыга билиһиннэрэр айымньыта. Түмүккэ Сайаара үлэтэ сыаналанан 1 истиэпэннээх Дипломунан, «За нестандартный подход к классике» диэн Бочуотунай грамотанан наҕараадаланна, салайааччыта Эмма Хрисанфовна Махтал суругунан бэлиэтэннэ, ону таһынан бэйэтин үлэтин уопутун, методикатын туһунан дакылаат ааҕан сэртипикээт тутта.

Кэмпириэнсийэ муус устар бүтүүтүгэр, биэс күн буолла, оҕолорго араас лиэксийэлэри, өй оонньууларын, экскурсиялары ыыттылар, оҕолор бырайыак оҥорон экспиэртэргэ көмүскээтилэр, элбэх ыйытыыга эппиэттээтилэр, бэйэлэрин норуоттарын билиһиннэрэн талааннарын көрдөрдүлэр. Сайаара саха норуодунай поэта Сэмэн Данилов «Мой русский язык» хоһоонун киэн тутта ааҕан биһирэннэ.
Салгыы Бүтүн Арассыыйаатаҕы «Наукаҕа маҥнайгы хардыы» диэн үөрэнээччилэр 35-с куонкурустарыгар кытынна.

Бу иккиэн туспа ирдэбиллээх күрэхтэр. Күрэх 20 сиэксийэнэн ыытылынна. «Литературоведение» сиэксийэҕэ 60-тан тахса оҕо кыттыбытыттан үрдүк таһымнаах эспиэр-учуонайдар, суруйааччылар, преподавателлэр Сайаара үлэтин үрдүктүк сыаналаан, «город Черкех» диэн биллэрэн туран, 1 истиэпэннээх Дипломунан наҕараадалаатылар. Эмма Хрисанфовнаҕа куонкурус кыайыылааҕын бэлэмнээбитин иһин Диплом туттардылар.

Саха сирин аатын дорҕоонноохтук ааттаппыт үөрэнээччини, Сайаара Ушницкаянаы, учуутал Эмма Хрисанфовнаны истиҥник эҕэрдэлиибит, өссө айымньылаах үлэни баҕарабыт!

Учуутал Э.Х. Кашкина уонна бииргэ сылдьыбыт, долгуйбут Сайаара эбээтэ А.С. Ушницкая Москуба куоракка тэриллибит дьоһуннаахай дьаһалларга ситиһиилээхтик кыттан, кыайан-хотон кэлэллэригэр көмөлөспүт дьоҥҥо: оскуола дириэктэрэ Е.В. Лебедевка, истиэндэни тиэхиньиичэскэй ирдэбиллэргэ сөп түбэһэр гына оҥорсубут завучтарга У.Д.Анисимоваҕа, А.Е.Никифоровка, техник- программист Г.А.Анисимовка, Р.Е.Легусинаҕа уонна бары эрэммит, өйөөбүт дьонноругар ис сүрэхтэриттэн махтаналлар, бары үчүгэйи баҕараллар.

Хаартыскалары Э.Х. Кашкина хааччыйда.