Нэһилиэккэ улахан кутталы үөскэппитэ. Ол курдук, уот Таатта үрэх уҥуоргу өттүгэр күүдэпчилэнэрэ. Суостаах уот баарын бу күннэргэ өссө төгүл биллэрэн, дьон сайыны быһа оттообут отторун мэҥиэстэн, алдьархайы оҥордо. Алдьархай диирбитигэр эрэ тиийэбит. Аны кыһын хороҕор муостаахтарын хайдах кыстатан таһаараллара улахан боппуруос буолла. Ити видеоҕа устууга барыта туох баарынан көстөр. "Сөптөөх миэрэни ылаллар ини", - диэн эрэнэллэрин биллэрэллэр олохтоохтор.
Кыйы баһылыгын солбуйааччы Василий Мухиҥҥа эрийэн ыйыталаспыппытыгар: "Дьиэбэгэнэ үрэххэ оттонуллубут 225 туонна оту уот былдьаата. Бу улахан хоромньу буолар. Таатта улууһун тыатын хаһаайыстыбатын управлениетын кылаабынай зоотехнига кэлэн барытын көрдө-иһиттэ. Сарсын аах оҥоруохпут, барытын хаартыскаҕа түһэриэхпит. Улуус тустаах управлениета уонна СӨ Тыатын хаһаайыстыбатын министиэристибэтэ тахсыбыт хоромньуну отунан толуйуохпут диэн эрэннэрдилэр", -- диэн иһитиннэрдэ.
"Ити айылаах баһаар туохтан таҕыста ?" диэн ыйытыы турар. СӨ Экологияҕа министиэристибэтин пресс-сулууспата иһитиннэрбитинэн, быһа барыллаан быһаарыынан отонньуттар эбэтэр кусчуттар дьалаҕай сыһыаннарыттан тахсыбыт. Билигин итиннэ сөптөөх бэрэбиэркэ бара турар.
- 0
- 0
- 0
- 0
- 0
- 0