Зинаида Иванова сахалыы таҥаһын сайбаччы кэтэн, баһаарынай систиэмэ үлэлиэр диэри, араас отторунан саллаат уолбутуттан саҕалаан ыраастаата, хомус дьүрүһүйдэ, хобо чуораан хоҥкунаата, кыһыны быһа хатталана сыппыт ыар санаалартан, хомолтоттон босхолоннубут. Остуол хотойорунан астаах сандалы тула олорон, Анал байыаннай дьайыыттан уоппускатыгар кэлэ сылдьар уолбут Анатолий Семенов баары баарынан кэпсээн, ийэлэри, эбэлэри уоскутта, хамандыырбыт олус үчүгэй киһи, онно икки эрэ омук баар -- өйдөөх уонна акаары диэн өйдөбүллээх, ким да кими да атаҕастаабат диэбитин олус үөрэ иһиттим.
Салгыы ийэлэр, эбээлэр ханнык да кулууп сыанатын киэргэтиэх, эдэр сылдьан кэппит таҥастарын-саптарын кэтэн, хааман-сиимэн тэлээрэ көттүлэр. 80 саастаах Мария Сантаева королева курдук чоруун, чочуонай көрүҥэ, көнөтө, мааныта ама, ким тэҥнэһиэ буоллаҕай?! Бэйэтигэр олус барардык, атаҕын таҥаһыттан төбөтүн оройугар диэри дьүөрэлээн таҥныбыт Альбина Федорова бу сибэкки эминньэҕиттэн түһэн кэлбит Дюймовочка. Улуу нуучча норуотуттан сыдьааннаах Людмила Филиппова киэҥ фантазията олох таһынан таһымнаан, ол кэмнээҕи крутой фотоаппараттаах, кепилээх интуристка диэн сымыйа. Лана Ващенко бу уобараһа, киэргэлэ элбэҕин. Хос эбэ Светлана Солодкая олох аппыһыар байыаннай көстүүмүнэн параадка хаама сылдьарын санатар. Уопсайынан бары үчүгэйдэр! Онтон Альбина Семенова, Александра Григорьева артыыс талааннарыттан күлэн сири тарбыы сыттыбыт.
Мин бу «Харысхал» түмсүүгэ сылдьан, урут алтыспатах дьоннорбун кытта билистим, элбэххэ үөрэнним, билбэтэх өрүттэрбин арыйдым.
Манна ыал ийэлэрэ, эбээлэрэ дьиэлэрин-уоттарын, оҕолорун-сиэннэрин, оҕуруоттарын түбүгүттэн быыс булан кэлэн мустан, ким да күһэйиитэ суох, баҕа өттүлэринэн, АБДь-га сылдьар байыастарга хахха буолар сиэккэлэри өрөллөр. Бу иһин кинилэргэ махтанабыт. Байыас уолбут Анатолий эппитинии: «Бу буола турар дьайыыга эһиги тус кылааккыт олус улахан, Кыайыы барыбыт киэнэ буолуо!».
-
1
-
0
-
0
-
0
-
0
-
0
