РФ норуотун үөрэҕириитин туйгуна, Учууталлар учууталлара, педагогика билимин хандьыдаата Маргарита Винокурова оскуола иннинээҕи саастаах кырачааннарга уонна алын кылаас үөрэнээччилэригэр аналлаах «Ньургуйаана уонна Нарыйаана» диэн кинигэни бэчээттэтэргэ көмөлөһөргө көрдөстө. Оҕону кыра сааһыттан ааҕарга үөрэтэргэ тупсаҕай тыллаах-өстөөх, ойуулаах кинигэлэр улахан оруоллаахтарын санатта. Ону таһынан Өймөкөөн улууһун Үчүгэй нэһилиэгин олохтоохторун туруорсууларын тиксэрдэ.
Хаҥалас улууһун Төхтүр нэһилиэгиттэн олохтоох сэбиэт дьокутаата Михаил Герасимов, үлэ бэтэрээнэ Мотрена Ефремова үс боппуруоһу туруордулар. Хас да ыал олорбут элбэх кыбартыыралаах уопсай дьиэ хаарбах туруктааҕынан 2016 с. билиниллэн көтүрүллүбүт, олохтоохтор дьиэ куортамнаһан олорор эбиттэр. Онон хаарбах туруктаах дьиэлэртэн дьону көһөрүү бырагыраматынан 40 кыбартыыралаах дьиэ тутуута тыын кыһалҕа буолбут. Владимир Егоров Дьиэни-уоту тутуу дириэксийэтин бырагыраамалары олоххо киллэриигэ отделын салайааччы быһыытынан, Төхтүргэ тутуллуохтаах дьиэ хаарбах туруктаах дьиэлэртэн дьону көһөрүү бырагырааматыгар киллэриллибитин, үбүлээһин «Олоххо-дьаһахха аналлаах инфраструктара» национальнай бырайыак чэрчитинэн, «Олорор дьиэ-уот» федеральнай бырагырааманан оҥоһулларын, үлэ хаамыыта федеральнай таһымынан саҥа мэхэньиисим ылылларынан бытаарбытын туһунан быһааран биэрдэ.
Икки боппуруоска харданы экология, айылҕаны туһаныы уонна ойуур хаһаайыстыбатын миниистирин солбуйааччы Анатолий Алексеев биэрдэ: Карапат учаастагар кытылы бөҕөргөтүү боппуруоһугар дьаһал ылылларыгар төрүт буолар докумуоннар ирдэниллэр эбиттэр. Оттон өртөөһүнү РФ Бырабыыталыстыбата баһаар барар диэн төрүт бобор, ол эрээри ТХНЧИ учуонайдара өртөөһүн тыа хаһаайыстыбатыгар төһө көдьүүстээҕин үөрэтэн ыыта сылдьар чинчийилэрин түмүгүнэн, сокуоҥҥа тустаах уларытыы киллэриллиэн сөп эбит.
Үһүс боппуруос нэһилиэнньэ ахсаана элбии, бөһүөлэк кэҥии турарынан, Төхтүргэ быыһыыр сулууспаны тэрийиигэ ананна. Онуоха кырасдааныскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыыга миниистири солбуйааччы Айаал Вензель маннык эттэ:
--Нэһилиэк дьокутааттарын көҕүлээһиннэрэ сөптөөх, быйыл аварийнай-быыһыыр кэлим муниципальнай сулууспа эспиримиэн быһыытынан Үөһээ Бүлүүгэ тэрилиннэ, эспиримиэн көдьүүстээҕэ көһүннэҕинэ, итинник сулууспалар атын улуустарга тэриллиэхтэрин сөп.
Көрсүһүүгэ киирбит этиилэр хонтуруолга ылылыннылар.
Ил Түмэн саайтын матырыйаалынан. Хаартыскалар эмиэ онтон.
-
5
-
0
-
0
-
0
-
0
-
0
