Кыайыы искибиэригэр суонаа туруоран, ол саҥа тигиллибит ураһа сарыы сабыытынан («дьиэ туоһа» диэччилэр) бүрүйэн, ураһабыт үйэлээх, сылаас буоллун диэн тураммыт, кулуһун оттон, алаадьынан айах тутан алҕаатыбыт.
Олохтоохтор баҕа өттүлэринэн 80-ча хаппыт, инчэҕэй таба тириилэрин аҕалан туттарбыттарын нэһилиэк Далбар хотуттара иистэнэр сыахха имитэн, тигэн, бэртээхэй диэн ураһа сарыы сабыытын оҥорон таһаардылар. Манна «Дьүөгэ», «Арчы», «Кирбэй кийииттэрэ», «Гудейкэн» түмсүүлэр, «Мичээр», «Алакуо», «Северянка» ансаамбыллар кыттыылаахтара бары саба түһэн, үс ый устата үлэлээтилэр. Саамай ыарахан үлэтигэр (тириини имитиигэ) эдэр ийэлэр, эбээлэр, Өлөөн бөһүөлэгэр олорор дьахталлар көмөлөстүлэр. Сыраны-сылбаны ылар күүстээх үлэттэн аҕам саастаах эдьийдэрбит Розалия Ивановна Полуэктова, Елена Константиновна Христофорова, Вера Васильевна Семенова, Ольга Потаповна Васильева туора турбатылар, тириини да имиттилэр, тиктилэр даҕаны. Эдэр ийэлэр тириини таҥастааһын төрүт үгэстэригэр кинилэртэн элбэххэ үөрэннилэр. Ол түмүгэр дьэ, чахчы да киһи санаата көтөҕүллэр, сүргэтэ үөрэр сабыыта буолан таҕыста. Мэлдьи күүс-көмө, сүбэ-ама буолар ийэлэр, эбээлэр, кийииттэр түмсүүлэрэ баалларыттан киһи үөрэр, киэн туттар.
Тириилэри туттарбыт Кирбэй хоһуун булчуттарыгар, табаһыттарыгар итиэннэ хатарыы, имитии, тигии үлэтигэр кыттыбыт Далбар хотуттарга бука барыларыгар махтанабыт. Олоҕу хамсатааччы, үлэни сүрүннээччи, дьиэ кэргэн туллар тутааҕа, иэримэ дьиэ иччилэрэ эһиги буолаҕыт!
Хаартыска: эрэдээксийэ архыыбыттан.
-
0
-
0
-
0
-
0
-
0
-
0
