2025 сыл муус устар 24 күнүгэр Госдуума мунньаҕар дьокутааттар иккис уонна үһүс ааҕыыларга сокуон барылын саҥа, үһүс эрэдээксийэтин ылыммыттара. Сокуоҥҥа биир сүрүн уларыйыынан үгэс буолбут балыктааһыҥҥа сайабылыанньанан быраабы ылыы бэрээдэгин көтүрүү буолла. Ол гынан баран, бу докумуонтан КМНС общиналарыгар, кэмиэрчэскэй тэрилтэлэри сэргэ, эбии балыктааһын кээмэйин ылалларыгар кыах биэрэр балаһыанньаны соттулар.
Балыктааһын туһунан сокуоҥҥа уларытыылары Госдуума көрүүтүгэр 2023 сыл атырдьах ыйыгар Федерация Сэбиэтин федеративнай тутулга, эрэгийиэннээҕи бэлиитикэҕэ, олохтоох салайыныыга уонна Хотугу сир дьыалаларыгар кэмитиэтин чилиэнэ Григорий Ледков, итиэннэ Госдуума национальностар дьыалаларыгар кэмитиэтин бэрэссэдээтэлин бастакы солбуйааччы Ильдар Гильмутдинов киллэрбиттэрэ.
Ил Түмэн дьокутаата Елена Голомарева өр көһүтүллүбүт сокуон ылыллыбытын, Хотугу, Сибиир уонна Уһук Илин төрүт олохтоох аҕыйах ахсааннаах норуоттарыгар балыктааһын быраабылата судургутуллубутун бэлиэтээтэ:
-- Сокуон өр уонна көхтөөхтүк ырытылынна. Бастаан утаа, Национальностар дьыалаларыгар кэмитиэт иһинэн оробуочай бөлөх мунньаҕын кэмигэр этиилэр оҥоһуллубуттара. Бу этиилэр Арассыыйа национальностарын дьыалаларыгар ааҕыныстыбаны кытта салгыы хардарыта үлэлээһиҥҥэ сүбэ быһыытынан ыйыллыбыттара. Чуолаан, сайабылыанньата суох бэрээдэгинэн уу биоресурсаларын туһанар көҥүллээх дьон испииһэктэригэр 14-гэр диэри саастаах оҕолору учуоттуур туһунан этиллэр. Мин саныахпар, сокуон күүһүгэр киирдэҕинэ, сайабылыанната суох бэрээдэк көдьүүһүн уонна табыгастааҕын өрөспүүбүлүкэ олохтоохторо сыаналыахтара. Бу уларыйыыны аһары бюрократизациянан уонна элбэх кумааҕыны толоруунан илиилэрэ баайыллыбыт балыксыттарбыт күүппүттэрэ. Бу тиэмэҕэ биһиги элбэх сүбэ мунньаҕы ыыппыппыт уонна этиилэрбитин Хотугу, Сибиир уонна Уһук Илин төрүт олохтоох аҕыйах ахсааннаах норуоттарын Ассоциациятын нөҥүө оробуочай бөлөх көрүүтүгэр биэрбиппит. Сокуон барылын туһунан боппуруоһу Григорий Ледков 2024 сыллаахха Илиҥҥи экэнэмиичэскэй пуорум «Төрүт олохтоох аҕыйах ахсааннаах норуоттар олохторо: үгэстэри харыстааһын, экэниэмикэни сайыннарыы уонна олох хаачыстыбатын үрдэтии» диэн кэпсэтиигэ көтөхпүтэ. Көрөргүт курдук, төрүт аҕыйах ахсааннаах норуоттар эрэйиэстирдэрин киллэрии чахчы тоҕоостооҕун олохпут көрдөрдө. Эрэйиэстиринэн биэнсийэни хааччыйыы уорганнара, булт хаһаайыстыбатын управлениета эмиэ көхтөөхтүк туһаналлар. Маны сэргэ, эрэйиэстир киириитэ үгэс буолбут айылҕаны туһаныы эйгэтигэр мөккүөрдээх боппуруостары сүрүннүүргэ көмөлөстө.
Тустаах сокуон балаҕан ыйын 1 күнүттэн 2026 сыл күүһүгэр киириэҕэ.
Иһитиннэрии уонна хаартыска: Ил Тумэн
-
0
-
0
-
0
-
0
-
0
-
0
