Онтоон , дьэ ыра санаа ымыыта оҥостубут Ыгыаттабар таҕыстым эбээт. Бииргэ үөрэммит дьүөгэм Клавдия Коплотовна оҕолоро бэйэлэрэ массыыналаах, мотуоркалаах буоланнар тойон олбоҕор олорон Ыгыатта ытык буоругар үктэнним. Манна аан бастаан миигин чуумпу соһутта. Бу чуҥкунуур, киһини ыгар, баттыыр чуумпу буолбакка, от-мас сипсиэрэ, көтөр-сүүрэр саҥата барыта ааҕа иһиллэр наҕыл, уу нуурал, холку , киһи бэйэтигэр бүгэн иһиллэниэн, истиэн баҕарар туох барыта тыынан эппэҥниир, киһи тылынан сатаан эппэт, дууһата ыллыыр кэрэ чуумпута. Ол иһин улуу Сибиэрэп Ыгыаттатын ырыалаах ыллыктарынан аргыый сылдьан, айылҕа муусукатын сүрэҕинэн истэн улуу муусукалары айбыт эбит. От-мас киһи сүрэҕин ортотунан киирэр сытыы сытын субу манна саҥаттан биллим. Бу үйэҕэ муннум, хараҕым бүөлэнэн сылдьыбыт дуу диэхпэр дылы.
Хайдах да бэйэлээх сиргэ, төһө да сылайан тиийдэрбин бастакы түүммэр утуйбат адьынаттаах этим. Онтон, манна , тугу да түһээбэккэ, уһуктан да көрбөккө, кутуйах да тыаһыттан уһуктар бэйэм, хаһаайыттар туран сарсыардааҥҥы ыамҥа да тахсалларын билбэккэ утуйан типтэрии.
Эбиэт кэннэ бу түмэл-уһаайба хаһаайката Любовь Афанасьева , үлэһиттэрэ Капитолина , Вилорд Ивановтар анаан минээн Томпоттон кэлэ сылдьар суруйааччыга, Сэгэлдьийэ Чээлэйгэ уонна миэхэ, бииргэ үөрэммит кыргыттарбыт Тоня, Клавушка арыалдьыттаах түмэли көрдүбүт. Бачча сааспар дылы араас түмэли көрдүм ини , көрбөтүм ини. Ол эрэн бу курдук миэхэ эрэ анаан кэпсииллэрэ, көрдөрөллөрө...олох атын эйгэ эбит. Улуу киһибит олоҕун, айар үлэтин, киһи быһыытынан ураты майгытын, маанытын-маратын сороҕун атын харахпынан көрдүм, сороҕун урукку санааларбын бигэргэттим. Оннооҕор бултуу сылдьан биир табаарыһынаан тайаҕы сырсан испиттэр . Табаарыһа булчут хаана уһуктан тайаҕын охторон баран көрбүтэ киһитэ суох эбит. Тайаҕын астаан баран киһитин көрдүү төннүбүт, туойар саҥатыттан сирдэтэн булбут. Киһитэ мас төрдүгэр туойа олорор үһү. "Урут ханна эрэ истибит тойукпун туура умнан кэбиспитим, саныы сатаан уһуннук да эрэйдэммитим, ити тайаҕы сырсан истэхпинэ кутуллан киирдэ, ону умнумаары туойдум, билигин баҕас умнубаппын!" Көр, талааннаах, үөрэҕэ суох киһи өйүгэр тутар дьоҕурун биир көрүҥэ эбит. Улуу "Оһуор" үҥкүүтүн аан бастакы таҥастара, барахсаттар киэннэрэ боростойо бэрт эбит . Ону улуу Москубаҕа маннык бараары гынаҕыт дуо диэн көстүүмнэрин бүтүн улууһунан саҥардыбыттарын, оччотооҕу таҥас-сап кырыымчыгар, сунтаардар ол да саҕаттан кэрэҕэ, мааныга тардыһыыларын чаҕылхай туоһута.
Оҕо эрдэҕиттэн сытыы-хотуу, мэник-тэник Аликкабын, билигин Сунтаар түмэллэрин хотунун Альбина Алексеевнаны, олох атын өттүттэн арыйдым. Кыыспыт талааннаах да эбит. Мин икки туочука нөҥүө көнө сурааһыны линейка эрэ көмөтүнэн тардар киһиэхэ, бу уруһуйдара үчүгэйин, анал ааттаахтара, дириҥ суолталаахтара сөхтөрдө. Кыстыы сытаннар улахан да үлэни оҥорбуттар. Махтал, Аликка.
Түүн түһээн көрбүт алгыстаах тэтиҥмин, тэлибирэс сэбирдэхтэрин сипсиэрин иһиллии, кууһан, эппэҥнии тыынар , эбэни өҥөйө сытар, күн уотугар дьирибинэс утахтарынан дьиримниир мэҥэ тааһы эппинэн-хааммынан ылынан, Уйгур Уйбаан оҥорбут аллаах тыытын илэ көрөн, алтыһан хаһан да хатыламмат дуоһуйууну иҥэринэн кэлбиппэр ытык Ыгыатта сиригэр үгүрү – сүгүрү!
Зинаида Федотова-Дьол кыыма, Сунтаар
-
3
-
3
-
0
-
0
-
0
-
0
