Айанньыттар массыынаттан түһээт көрсөөччүлэр эҕэрдэ тылларыттан сүргэлэрэ көтөҕүлүннэ, алаадьы сиэн алгыстаннылар, быырпах иһэн уруйданнылар, кии сытынан ыраастаннылар. Саҥардыллыбыт, тупсарыллыбыт сир быысаһыытын сонурҕуу көрдүлэр, хаартыскаҕа түстүлэр.
Кыраныыссаҕа айанньыттары Кыйы нэһилиэгин олохтоохторо көрүстүлэр. Кинилэр кэпсииллэринэн, бэҕэһээҥҥиттэн солбуһа сылдьан ыалдьыттары көрсөллөр, бүгүҥҥүттэн сырыы тэтимирбит, быыстала суох үгүс массыына ааһар.
Кыраныысса чахчы киһи хараҕын сымнатар гына тупсубут. Манна улуус 14 нэһилиэгин көрдөрөр дулҕа төгүрүччү туруоруллубут. Хас дулҕа ахсын нэһилиэктэр устуоруйалара куйаар куодунан оҥоһуллан иилиллибиттэр. Бу 14 дулҕа Таатта биир сомоҕо буоларын кэрэһэлиир. Маны таһынан, кыраныысса олбуора, аарката саҥардыллыбыт, кэрэ көстүүлэммит.
Таатта биир кэлим дизайн-куодунан оҥоһуллубут айан суолугар сытар Кыйы, Победа, Ытык Күөл ааркалара күн сырдыгар күлүбүрдүү оонньууллара ураты көстүүлээх уонна туох эрэ дьиктигэ угуйа-манньыта ыҥырарга дылылар. Онон, үгэс буолбут Оонньуулар бэркэ ааһыахтара диэн эрэллээхпин.
Антонина НЕУСТРОЕВА
-
2
-
0
-
0
-
0
-
0
-
0
