-- Бүгүн остуол оонньууларыгар иккис күнүн күрэхтэһиилэр буола тураллар. Дьон санаатын, туругун көрдөххө, куруутун буоларын да курдук, сүрдээх тыҥааһыннаах. Үрдүк түмүллүүнү, болҕомтону ирдиир судургута суох оонньуу буолан, хас биирдии хамсаныы суолталаах. Ол иһин күрэсчиттэрбит, тэрийээччи да дьоммут улахан күүрүүгэ сылдьаллар. Бу түөрт сылы быһа бэлэмнэммит саамай сүрүн оонньуубутугар долгуйуу баар. Ол да буоллар, мин сэрэйэрбинэн, сабаҕалыырбынан саҥа, эдэр эрчимнээх кыттааччыларбыт чыпчаал таһымнары көрдөрүөхтэрин сөп. Маныаха, бэтэрээннэрбит эмиэ маннык санаалаахтар. Этэргэ дылы, балаһыанньа байыаннай, быһыы-майгы тыҥааһыннаах. Бүгүн киэһээ кыайыылаахтырбытын билиэхпит.
Урукку Манчаары оонньууларыгар муҥутуур кыайаалааҕы быһаарар биир эрэ күрэхтэһии баар эбит буоллаҕына, быйыл дьахталлар уонна эр дьон тус туһунан оонньуохтара. Аан Дархан аатын ылыы иһин оонньууларга дьахталларга уонна эр дьоҥҥо 50-нуу тыһыынчаны бэйэм ааппыттан туруордум, итиэннэ Таатта улууһуттан спонсарбыт автооскуолаҕа үөрэххэ 50 тыһ. сэртипикээти Таатта кэскиллээх ыччатыгар туттарыаҕа.
Быйылгы Манчаары оонньууларыгар уратыбыт диэн, “тоҕус тоҥсуур” оонньууну аан бастакытын сүрэхтиэхпит. Александр Еремеевич Артемьев “Саха ынаҕа” диэн тэрилтэтиттэн биир ньирэйи туруорда. Онон бүгүн киэһэ ыытыллар “тоҕус тоҥсуур” уһулуччулаах уонна кэрэхсэбиллээх буолуоҕа. Оонньооччулар биир хаамысханы үөһэ быраҕан баран, тоҕуһу тэҥинэн хомуйан ылыахтаахтар. Ол иһин, муҥутуур кыайыылааҕы быһаарар да күрэхтэһииттэн уустук оонньуу курдук, дэгиттэр киһи кыайар оонньуута.
Ытык Таатта сирэ, улуу убайдарбыт сирдэрэ, биһигини наһаа үчүгэйдик көрүстэ. Хас биирдии көрүҥҥэ кыайыыга эрэллээх, дьулуурдаах дьон кэлбитэ көстөр. Сүрдээх элбэх киһи кэлбит. Олохтоохтор кинилэри барыларын олохтоон, тэрийэн, аһатан-сиэтэн, экскурсияларга сырытыннаран, үҥкүүлэтэн үрдүк таһымҥа Манчаары оонньууларын тэрийбиттэрин бары бэлиэтиибит. Таатта улууһун бааһылыга Айаал Бурцев биһиги Федерациябыт мин иннинэҕи бэрэсидьиэнэ буолар. Айаал Семенович остуол оонньууларын инэриэһиргиир, кэлэн биһигини көрөн-истэн барар. Бу биһиэхэ ураты бэлиэ.
Антонина НЕУСТРОЕВА
Хаартыска ааптар түһэриитигэр.
-
0
-
0
-
0
-
0
-
0
-
0
