Куорат дьаһалтатын баһылыга Евгений Григорьев иһитиннэрбитинэн, бырааһынньыктарга уонна улахан суолталаах тэрээһиннэр ыытыллар күннэригэр арыгы атыылааһынын аҕыйатар туһуттан, «Саха Өрөспүүбүүкэтигэр арыгы бородууксуйатын розницанан атыылааһын бириэмэтигэр, усулуобуйатыгар уонна миэстэтигэр эбии хааччахтааһыны киллэрэр туһунан» сокуон 2-с ыстатыйатыгар уларытыы киллэрэр ирдэнэр. ИДьМ чахчытынан, былаас уорганнара уопсастыбаннас өйөбүлүнэн ылбыт дьаһалларын түмүгэр, өрөспүүбүлүкэҕэ кэнники кэмҥэ итирик туруктаах сылдьан буруйу оҥоруу биллэрдик аҕыйаабыт. Ол курдук, 2016 с. түмүгүнэн буруй 38,9 %-а арыгыны иһииттэн төрүөттээх буоллаҕына, 2024 с. бу көрдөрүү 18,55 % буолбут.
Ол эрээри, манна биир уустук баар. Холобур, Үс Хатыҥҥа ыһыах ыһыллар күннэригэр киин куорат атын түөлбэлэригэр арыгы атыытын бобор кыах суох. Куорат күнүгэр маассабай тэрээһиннэр ыытыллыбат сирдэригэр эмиэ итинник. Инньэ гынан, Туймаадаҕа ыһыаҕар, Оҕо көмүскэлин күнүгэр уонна Билии күнүгэр арыгы атыытын куорат үрдүнэн бобор көдьүүстээҕэ этилиннэ. Маннык бобууну улуустарга олохтоох дьаһалталар быһаарыыларынан, ыһыахха, куорат (бөһүөлэк, нэһилиэк) күнүгэр уонна «Тиһэх чуораан» күнүгэр оҥоруохха сөбө бэлиэтэннэ.
Дьокутаатар сүбэлэһэн бараннар, сокуон барылын көрүүнү өйөөтүлэр, тиэкискэ эрэдээксийэлиир майгылаах этиилэри киллэрдилэр. Мунньахха норуот дьокутааттара Алена Атласова, Иван Луцкан, Иван Данилов, Алексей Корнилов, Нюргуяна Заморщикова, Иннокентий Романов, Дмитрий Паньков, Николай Бугаев кыттыннылар диэн Ил Түмэн пресс-киинэ иһитиннэрэр.
Хаартыска: Ил Түмэн саайтыттан.
-
0
-
0
-
0
-
0
-
0
-
0
