Эпэрээссийэлиир блокка
Кэнники сылларга диагностыыр, эмтиир, эпэрэссийэлиир тэрили саҥардыы үлэтэ күүскэ ыытыллыбыт, онон аныгы технологиянан толору сэбилэммит, эпэрээссийэни 10 остуолунан оҥорор катаракта уонна рефракционай хирургия салаата былырыын күһүҥҥүттэн аһыллан үлэлии-хамсыы турар.
– Биһиги манна күҥҥэ 50-ҥа тиийэ эпэрээссийэни оҥоробут. Бүгүн эһиги Донецкай уобаласка өрөспүүбүлүкэ шефтэһэр куораттарыгар элбэх төгүл баран үлэлээн кэлбит эмчиттэр: Саха Өрөспүүбүлүкэтин үтүөлээх бырааһа Иннокентий Белолюбскай, медсиэстэрэ Айталина Токусарова эпэрээссийэ оҥороллорун көрүөххүт, кинилэргэ анестезиолог, соторутааҕыта билим хандьыдаатын диссертациятын көмүскээбит Зинаида Новгородова көмөлөһүөҕэ, – диэтэ Иван Луцкан.
Өр-өтөр буолбата, кириэһилэнэн анньан биир саастаах дьахтары аҕаллылар. Катараакта буолбут хараҕын эпэрээссийэлиир эбиттэр. Сиэстэрэ бэрт үөрүйэхтик туттан-хаптан, ыарыһах хараҕын туһунан, иэдэһин үөһээ өттүгэр укуол биэрдэ, онтон биэс мүнүүтэ буолан баран, кушеткаҕа сытыардылар.
– Холкутук сыт, төрүт долгуйума, куттаныма, эпэрээссийэ кэмигэр туох да ыалдьыа суоҕа, кылаабынайа, биһиги тугу этэрбитин иһит, толор, – диир Иван Петрович ыарыһах төбөтүгэр олорон.
Бастаан эпэрээссийэлиир «хонууну» бэлэмнээтилэр, ыраастаатылар. Ыарыһах сирэйин анал салпыатканан саптылар, «оҥоһуллар» хараҕын эрэ аһаҕас хааллардылар, халтаһатын анал тэриллэринэн чырбаччы тардан, кэҥэттилэр. Препарат куттулар, онтон дьэ саҕаланна эбээт...
Эпэрээссийэ хайдах оҥоһуллара, онно туох уларыйыы тахсара барыта көмпүүтэр экрааныгар көстө турда, ону кылаабынай быраас барытын сиһилии быһааран истэ... Эргэрбит хрусталик маассатын үлтүрүтэн баран ылаллар, ол оннугар хомуллар оҥоһуу линзаны олордоллор... Хараҕы укуол иннэтинэн анньаллара көстүбүтүгэр чараас сүрэхтээх, поэт дууһалаах суруналыыстар: «Айакка!» – дэһэ түстүлэр. Онуоха ким тулуйбат тахсыан сөбө этилиннэ эрээри, баҕалаах суох буолла. Бастакы укуолу биэрииттэн саҕалаан, катараакта эпэрээссийэтэ 20 мүнүүтэнэн оҥоһуллар эбит.
Матырыйаалы сиһилии хаһыакка ааҕыаххыт.
Хаартыска: ааптар түһэриитэ.
-
0
-
0
-
0
-
0
-
0
-
0
