Маны таһынан уопсай бас билиигэ киирэр олбуортан, подъезтан, сатыы дьон сылдьар суолуттан, дьиэлэр икки ардыларынааы суолтан уо.д.а. хаары, мууһу, кырыыһаҕа тоҥмут муус чопчутун кэмигэр ыраастаабатахха, административнай буруйу оҥоруу туспа көрүҥүн быһыытынан, дуоһунастаах сирэйдэртэн 40-80 тыһыынча, юридическай сирэйдэртэн 200-500 тыһ солк харчыны ыстарааптыырга эппиттэр. Халтараантан, үөһэттэн түһэр муустан о.д.а. дьон оһоллонноҕуна, эчэйии туругуттан көрөн, ыстараап кээмэйэ дуоһунастаах сирэйдэртэн 100-200 тыһ., хампаанньалартан 600-900 тыһ солк буолуохтаах. Маннык көҕүлээһини «Сиэрдээх Арассыыйа» баартыйа салайааччыта, фракция бэрэссэдээтэлэ Сергей Миронов уонна Госдуума гражданскай уопсастыбаны сайыннарыыга кэмитиэтин бэрэссэдэээлэ Ян Лантратов оҥорбуттар.
Быһаарыыга суруллубутунан, федеральнай сокуон барыла элбэх кыбартыыралаах уопсай дьиэлэри, олбуордары көрүүгэ-истиигэ, ыраастык тутууга, куттал суох буолуутун хааччыйыыга административнай эппиэтинэс көдьүүһүн үрдэтэр сыалтан оҥоһуллубут.
Санаттахха, билигин үлэлиир сокуон быһыытынан, олбуор хаарын куһаҕаннык ыраастаабыт эбэтэр кэмигэр ыраастаабах салайар хампаанньалар (УК-лар), ТСЖ-лар 300 тыһ солк харчыга тиийэ ыстараабы төлүөхтэрин сөп. Тротуардар хаар түһэр кэмигэр үс чаас аайы, хаар түһэн бүппүтүн кэнниттэн 3-12 чаас иһинэн ыраастаныахтаахтар. УК-лар дьиэлэр үрдүлэрин, кырыыһаларын мэлдьи бэрэбиэркэлии, муустан, хаартан ыраастыы сылдьыахтаахтар. Бу туһунан Дьокуускай куорат Дууматын пресс-сулууспата суруйар.
Хаартыска: тустаах саайтан.
-
0
-
0
-
0
-
0
-
0
-
0
