Уопсастыба

Түмсүү тэрээһининэн, Дьокуускай куоракка хас өрөбүл ахсын кыһыҥҥы өттүгэр «Арчы» дьиэтигэр, сайын – Сынньалаҥ пааркатыгар оһуокай тохтоло суох ыытыллар. Кыһыҥҥы ыйдарга куоракка олорор улуустар түмсүүлэрин кытары үлэлээн, тохсунньу 4 күнүгэр Анаабыр, тохсунньу 11 күнүгэр Чурапчы, тохсунньу 25 күнүгэр Сунтаар, олунньу 1 күнүгэр Уус Алдан, олунньу 8 күнүгэр – Усуйаана, олунньу 15 күнүгэр Абый, кулун тутар 1 күнүгэр Амма, олунньу 15 күнүгэр Таатта, кулун тутар 29 күнүгэр Үөһээ Бүлүү, муус устар 5 күнүгэр Хаҥалас, муус устар 12 күнүгэр Кэбээйи, муус устар 19 күнүгэр Горнай улуустарыгар ананан, элбэх саҥа этээччи этэн астынан бардылар.

Ыам ыйын кэскилбитигэр, оҕолорго уонна ыччаттарга анаатыбыт. Ыам ыйын 3 күнүгэр үтүөлээх этээччи Сибэкки Заровняева орто кылаас үөрэнээччилэрин кытары кэлэн кыттыбыта. Кыайыы күнүгэр Кыайыы болуоссатыгар биэс чаас устата тохтоло суох оһуокай буолбута. Быйыл 29 этээччи эттэ. Элбэх эдэр оҕолор кытыннылар. А. Макарова аатынан култуура кэллиэһин устудьуоннара, учууталлара, биһиги кэскиллээх этээччибит Сергей Алексеев көҕүлээн элбэх ыччат кэлэн кытынна. «Арычга» быйылгы кыстыгы түмүктүүр оһуокайбытын үтүөлээх этээччи Мария Иванова дьарыктыыр оҕолорунаан кэлэн оһуокайдаатылар. 13 үөрэнээччи кэлэн эттэ. Ыам ыйын 23 күнүгэр Бырабыыталыстыба өйөбүлүнэн, иккис төгүлүн ыччат оһуокайын күрэҕэ буолла. Онно 24 улуус, Мииринэй, Дьокуускай куорат ыччаттара кытыннылар.

Түмсүүбүт салайааччыта А.Д. Данилов көҕүлээһининэн, быйыл Таатта улууһугар Уус Тааттаҕа оҕолор күрэхтэригэр Дархаттар сүбэлэрин бэрэссэдээтэлэ В. Хоруновтыын тахсан үлэлээн киирдибит. Олунньу 8 күнүгэр Хаҥалас улууһун оһуокайын күрэҕэр алта буолан тахсан кытынныбыт. Кылаан бирииһи Мэҥэ Хаҥаластан Дьулустаан Михайлов ылбыта. Ааспыт 2025 сылга Хаҥаласка Малдьаҕарга «Саха Боотура» түмсүү салайааччыта А.Ю.Артамонов быһаччы көҕүлээһининэн хаста да тахсан, төгүрүк остуолга кыттан, маастар- кылаас ыытан киирбиппит. Ол курдук Самартай, Малдьаҕар оһуокайдара тэриллибитэ. Олунньу 25 күнүгэр Майаҕа сэл. баһылыга А.И.Неустроев ыҥырыытынан салайааччыбыт А.Д.Даниловы кытары алта буолан тэрилтэлэр көрүү фестивалларыгар эр дьон оһуокайга күрэҕэр дьүүллүүр сүбэҕэ үлэлээн киирбиппит. Итинник тэрээһин иккис сылын ыытыллар. Олунньу 28 күнүгэр алта буолан Хачыкаакка Самыртай оһуокайын тэрээһинигэр кыттыбыппыт. Олунньу 7-8 күннэригэр Хаҥалас улууһун Иккис Малдьаҕар нэһилиэгин «Бөртө оһуокайа» тэрээһинигэр дьүүллүүр сүбэҕэ үс Дархан, Аар Дархан этээччи Р.М. Тихонова бэрэссэдээтэллээх үлэлээбиппит.

Кыһыҥҥы суол сабыллыан иннинэ Чурапчы улууһун «Оһуокай» түмсүүтүн кытары бииргэ үлэлииргэ сүбэлэһэн киирбиппит. Манна эмиэ алта буолан тахсан оһуокайга маастар-кылаас ыыппыппыт. Улуустарга тахсар тэрээһиҥҥэ Дархан түмсүүтүн бэрэссэдээтэлэ В.Хоруновтыын былааннаһан хас да буолан тахсарбыт үгэскэ кубулуйда. Ыам ыйын 22 күнүгэр үтүөлээх этээччи П.Г.Сивцев 80 сааһын туолбут үбүлүөйдээх оһуокай күрэҕэр түмсүүттэн үс буолан тахсан дьүүллүүр сүбэҕэ үлэлэһэн киирдилэр.
Аны бэс ыйын 27-28 күннэригэр «Үс Хатыҥ» өрөспүүбүлүкэтээҕи күрэҕи ыытар былааннанар.

Хаартыска: Ааптар архыыбыттан.