Уопсастыба

Кэрэ-бэлиэ түгэҥҥэ бэлэмнэниилэр чэрчилэринэн, бу күннэргэ Ем. Ярославскай аатынан хотугу норуоттар устуоруйаларын уонна култуураларын үөрэтэр түмэлигэр “Урожай” быыстапката көрдөрүүгэ туруорулунна. В.П. Кочнев, М.Е.Друзьянов хаартыскалара, улахан экраҥҥа көстө турар 170 хаартыскалардаах видео-слайд, “Урожай” спортивнай уопсастыбаҕа бэрэссэдээтэллээбит Аркадий Михайлович Алексеев мэтээллэрэ, грамоталара, Прокопий Прокопьевич Готовцев “Урожай-50” үбүлүөйүгэр оҥорторбут стендэтэ, РСФСР “Урожайын” былааҕа, Саха Сирин “Урожай” спортивнай уопсастыба тоҕус бэрэссэдээтэллэрин хаартыскалара болҕомтону тардаллар. Олохторун “Урожайга” анаабыт, киэҥ далааһыннаах күрэхтэһиилэргэ үгүс көмүс көлөһүннэрин тохпут успуорт бэтэрээннэрэ, оччотооҕу кэм тэрийээччилэрэ, салайааччылара кэлэн кыттыыны ыллылар, санааларынан үллэһиннилэр.

СӨ успуорка түмэлин дириэктэрэ Михаил Друзьянов: “Сырдатар-көрдөрөр үлэбит саҕаланна эрэ, инньэ гынан, эспэнээттэрбит ситэ-хото киирэ иликтэр. Матырыйаалларбыт аҕыйахтар. Аанньа аҕала иликтэр. Ох ытыытыгар эспэнээттэр суохтар. 1960-1970 сыллардаахха оҥоһуллубут “Книга Почета” баара да, ханна тиийбитэ-түгэммитэ биллибэт. Ханна баарын билэр дьон тиксэрэргит буоллар, махталлаах дьыала буолуо этэ. Итилэри этээри ыҥыртаатым. Матырыйааллары булууга көмөлөһүҥ, биэриҥ диэн. Тыа сирин успуордун устуоруйата киэҥ. Успуорпут түмэлэ Ярославскай түмэлин филиалынан буолла. Онон, лаппа кэҥиир кыахтанныбыт. Суруналыыстар Р.Ю. Кривогорницын “Урожай” үбүлүөйүгэр аналлаах кинигэ, В.Ф.Посельскай видео-киинэ оҥоро сылдьаллар. Элбэх историческай матырыйааллар М.В.Алексеевка бааллар. Өрөспүүбүлүкэ успуордун миниистирэ Л.Н. Спиридоновка үбүлүөйгэ аналлаах сүбэ-мунньах буолбута. Бэлэмнэнии үлэ барар, үбүлүөй буолар”, -- диэн быыстапка ис хоһоонун, сыалын-соругун иһитиннэрдэ.

Дьиҥинэн, “Урожай” былааҕын аннынан күрэхтэспит, ааттарын-суолларын, оройуоннарын, улуустарын, Арассыыйа, ССРС киин куораттарынан Сахаларын Сирин соргулаахтык ааттаппыт дьоммут элбэхтэр. Холобур, Баһылай Манчаары спартакиадаларын чөмпүйүөннэрэ, призердара мэтээллэрин, кубоктарын, дипломнарын, хаартыскаларын аҕаланнар көрдөрүүгэ туруораллара буоллар, быыстапка улаханнык байытыллыа эбит. “Урожай” хаттаан тэриллэрэ буоллар, улахан сэргэхсийии тахсан, дьон-сэргэ махтала улахан буолуо этэ.

Кэмэнтээрийдэр

Афанасий Петрович Илларионов, марафоҥҥа Саха АССР чөмпүйүөнэ, рекордсмена:

-“Урожай-75” сыллаах үбүлүөйүн туһунан иһитиннэриилэр улуустарга тиийэ иликтэр. Билбэт дьон элбэх. Официальнай суруктары ыытар наада. “Урожайга” үлэлээбит, күрэхтэспит дьон матырыйааллары көмөлөөн хомуйуоххайыҥ. Мэҥэ Хаҥалас түмэлигэр тахса сылдьаарыҥ, көрөөрүҥ. Бары сомоҕолоһон үтүө тэрээһиҥҥэ кыттыаҕыҥ. Хоту улуустар эмиэ. Хаһыаттарга ыстатыйалары биэриэххэ. Бастакы ыстатыйабын бэлэмнээбитим, “Дьулурҕаҥҥа” тахсыаҕа. Биир эрэ киһиэхэ найылаамыаххайыҥ.

Прокопий Прокопьевич Готовцев, 1992-96, 2003-2019 сылларга “Урожай” физкультурнай-спортивнай тэрилтэ бэрэссэдээтэлэ, СӨ физическэй култуураҕа уонна успуорка үтүөлээх үлэһитэ:

-Биһигир, “Урожайдар”, физкултуура уонна успуорт сайдыыларыгар киллэрбит кылааппыт улахан. Арассыыйаҕа, аан дойдуга биллэн, билинэн, бастыҥ эрэгийиэн буоларбытынан киэн туттабын! Билигин үлэлии сылдьар дьоҥҥо махталбын биллэрэбин. Аан бастаан холкуостаахтары мунньан, сайдан, ааһа баран, тыа сирин дьонун барыларын хабан киэҥ далааһыннаах үлэлэр ыытыллыбыттара. 1992 с. Петр Егорович Попов миниистирдээх Успуорт министиэристибэтэ тэриллэн үөрдүбүтэ. Өрөспүүбүлүкэ “Урожайын” иккистээн тэрийбиппит. Тыа сиригэр хамсатыылаах үлэ барбыта. Онтон тохтуу сылдьыбыта. М.Д. Гуляев Госкомспорт бэрэссэдээтэлинэн ананан кэлэн, өйөөн, 2003 с. “Урожай” физкултуурунай-спортивнай тэрилтэ хаттаан сөргүтүллүбүтэ. “Автономнай некоммерческай” тэрилтэ быһыытынан регистрацияламмыппыт. Үлэ 2019 с. диэри ыытыллыбыта. Ити кэмнэргэ Спиридон Константинович Попов, Егор Егорович Неустроев эмиэ салайа сылдьыбыттара. Тыа сирин дьоно астыммыта. Успуорт министиэристибэтин үлэтин хатылаабатахпыт. Тыа сирин үлэтин-хамнаһын, маассабай физкултуураны-успуорду өрө тутар хайысхалаах, “профессиональнай-прикладной” үлэлэр, араас өрүттээх дьаһаллар, нэһилиэктэринэн култуурунай-спортивнай эстэпиэтэлэр дьон көҕүн көтөхпүттэрэ. Кыһыҥҥы-сайыҥҥы кэмнэргэ успуорт национальнай көрүҥнэригэр Арассыыйаҕа бастыырбыт, миэстэлэһэрбит. Бүтүн Арассыыйатааҕы тыа сирин Спортивнай оонньууларыгар бэйэбит бөлөхпүтүгэр үһүс миэстэттэн түспэтэхпит. XXI үйэҕэ таһымнаахтык үлэлээн, тыа сирин спортсменнара тыа сиригэр баалларын биллэрэн үлэлээбиппит.

Ааптар хаартыскаҕа түһэриитэ.