Үлэлиир биэнсийэлээхтэргэ биэнсийэлэрин хат ааҕыахтара
Атырдьах ыйын 1 күнүттэн үлэлиир биэнсийэлээхтэр биэнсийэлэрэ үрдүөҕэ. Бу 2013 сыл ахсынньы 28 күнүнээҕи 400 №-дээх «Страховой биэнсийэлэр тустарынан» сокуон нуормаларынан көрүллэр. Манна биэнсийэ анаммытын кэнниттэн официальнайдык үлэлии хаалбыт, оттон үлэни биэрээччилэр кинилэр туһаларыгар Арассыыйа социальнай пуондатыгар (АСП) страховой усунуостары төлөөбүт дьон тустарынан этиллэр. Тустаах пуондаҕа сылдьар наадата суох: былырыын киирбит суумаларынан хат ааҕыыны бэйэлэрэ оҥоруохтара. Хат ааҕыы киһи төһөнү үлэлээбититтэн тутулуга суох — биир ый дуу, уон икки ый дуу. Ол эрээри, хос ааҕыыны суоттуурга бүтэһик бириэмэ учуоттаныаҕа.
Лүөччүктэргэ уонна шахтердарга биэнсийэлэрэ үрдээтэ
Атырдьах ыйын 1 күнүттэн гражданскай авиация лүөччүктэригэр уонна таас чох бырамыысыланнаһын үлэһиттэригэр ыйдааҕы эбии төлөбүрү хос ааҕыахтара. Бу 2001 сыл сэтинньи 27 күнүнээҕи 155-с №-дээх федеральнай сокуонунан көрүллэр. Бу эбии төлөбүрдэр буортулаах уонна ыарахан усулуобуйаҕа үлэлиир иһин бэриллэллэр. Эбии төлөбүрү сылга түөрт төгүл: олунньу 1, ыам ыйын 1, атырдьах ыйын 1 уонна сэтинньи 1 күннэригэр индексациялыахтара. Кини кээмэйэ индивидуальнай уонна анал ыстаас, үлэ усулуобуйатын уонна ааспыт кыбаарталга киллэриллибит усунуостар суумаларыттан тутулуктаах. Төлөбүр тус сайабылыанньата суох ыстаас туһунан дааннайдарынан уонна салаа реестрдэринэн сирдэтиллэн ананыаҕа.
Соцпуонда мунньуллар биэнсийэ кээмэйин уларытыа
Атырдьах ыйын 1 күнүттэн Соцпуонда мунньуллар биэнсийэлэр уонна болдьохтоох биэнсийэ төлөбүрдэрин кээмэйдэрин көннөрүөҕэ. Бу «Мунньуллар биэнсийэ туһунан» 2013 сыл ахсынньы 28 күнүнээҕи 424-с №-дээх федеральнай сокуонунан көрүллэр. Мунньуллар биэнсийэлэр 17,3 бырыһыан үрдүөхтэрэ, оттон болдьохтоох биэнсийэ төлөбүрдэрэ — 19,32 бырыһыан. Мунньуллар биэнсийэни 133 тыһыынчаттан тахса киһи уонна болдьохтоох төлөбүрдэри 34 тыһыынча кэриҥэ киһи ылыаҕа.
Таможня сорох үлэһиттэрэ эбии уоппуска ылар бырааптаныахтара
Атырдьах ыйын 6 күнүттэн байыаннай дьайыы бэтэрээнин ыстаатыһа баар таможня уорганнарын үлэһиттэрэ сыллата эбии уоппуска ылар бырааптаныахтара. Ол туһунан 2026 сыл от ыйын 26 күнүнээҕи 260-с №-дээх федеральнай сокуон атырдьах ыйын 6 күнүттэн күүһүгэр киирэр. Маннык уоппуска уһуна 15 халандаарынай күн буолуоҕа, ону сүрүн уоппускаҕа холбуохха сөп. Бу 15 күнү хамнаһа суох уоппускаҕа уларытан, сылга 35 күҥҥэ диэри ылалларын солбуйуохтарын сөп.
Хаартыска "Парламентская газета" саайтан.
-
0
-
0
-
0
-
0
-
0
-
0
