Уопсастыба

Волонтердар судаарыстыбаттан өйөбүлү ылыахтара

Аһымалы тэрийии уонна волонтерскай үлэ сыалларын испииһэгэр саҥа пуун эбиллиэҕэ — «сирдэри-уоттары тупсарыыга көмөлөһүү» диэн. Ол туһунан 2026 сыл от ыйын 26 күнүнээҕи 267-с №-дээх федеральнай сокуон атырдьах ыйын 6 күнүттэн күүһүгэр киирэр.
Мантан ыла маннык волонтердар судаарыстыбаннай өйөбүлү: граннары, субсидиялары, ону тэҥэ тэрээһиннээх, иһитиннэрэр-биллэрэр уонна сүбэҕэ-амаҕа сыһыаннаах көмөнү ылар кыахтаныахтара. Урут бу испииһэк сабыылаах этэ. Социальнай хайысхалааҕа, ыксаллаах быһыыга-майгыга көмөнү, айылҕаны харыстааһыны, дьиэ кэргэни өйөөһүнү, үөрэҕириини, култуураны, успуорду уонна донорствоны эрэ киллэрэрэ. Сири-уоту тупсарыы туһунан туспа строка суох этэ.

Салайар хампаанньалар ыстырааптаныахтара

Арассыыйаҕа элбэх кыбартыыралаах дьиэлэргэ тустаах тэрили туруорууга уонна көрүүгэ-истиигэ сибээс эпэрээтэрдэрин киллэрбэт салайар хампаанньаларга мөлүйүөн солк. аҥаарыгар диэри ыстараабы олохтуохтара. Ол туһунан 2026 сыл от ыйын 26 күнүнээҕи 247-с №-дээх федеральнай сокуон атырдьах ыйын 6 күнүттэн күүһүгэр киирдэ.
Ыстарааптар дьиэ уопсай баайыгар-дуолугар сибээс ситимин таҥыы, үлэлэтии эбэтэр көтүрүү кэмигэр бииргэ үлэлээһин быраабылатын кэһии иһин түһэриллиэхтэрэ. Дуоһунастаах сирэйдэргэ ыстараап 10 тыһыынчаттан 40 тыһ. солк. диэри, юридическай сирэйдэргэ (Салайар хампаанньаларга) 100 тыһыынчаттан 500 тыһ. солк. диэри буолуоҕа.

Сим-каарталары омуктарга биэриигэ эппиэтинэскэ тардыахтара

Сим-каарталары омуктарга атыылааһын быраабылатын иккиһин кэспит дьоҥҥо холуобунай эппиэтинэс олохтонуоҕа. Ол туһунан 2026 сыл от ыйын 26 күнүнээҕи 251-с №-дээх федеральнай сокуон атырдьах ыйын 6 күнүттэн күүһүгэр киирэр. Манна кэпсэтии омук киһитиниин дуогабар түһэрсии туһунан барар, оннук докумуоҥҥа туттар тэрил идентификаторынн (IMEI) туһунан дааннайдар киирэ илик буоллахтарына. Холуобунай накаастабыл сыл устата иккитэ административнай эппиэккэ тардыллыбыт эбэтэр бу ыстатыйанан сууттаммыта сотулла илик дьоҥҥо. Сокуону кэһээччилэртэн 500 тыһ. солк. диэри ыстараап ылыахтара. Ону таһынан кинилэри булгуччулаах эбэтэр көннөрүнэр үлэҕэ ыытыахтара эбэтэр биир сылга диэри көҥүлү хааччахтыахтарын сөп.
Маны таһынан сокуон чааһынай олоххо орооһууну утары эппиэтинэһи кытаатыннарар. Тус дааннары сокуоннайа суох хомуйуу уонна тарҕатыы, ону тэҥэ суруйсуу уонна кэпсэтии кистэлэҥҥэ сылдьыахтааҕын кэһиилэр киирэллэр. Өскөтүн ити кэһиилэр дьон бөлөҕүнэн оҥоһуллубут эбэтэр харчы интэриэһиттэн тахсыбыт буоллаҕына, дуоһунас боломуочуйатын туһанан буруйу оҥорууга тэҥниэхтэрэ

Буруйу оҥорбут миграннар Арассыыйа пааспара суох хаалыахтара

  Болдьоҕун иннинэ босхоломмут дьону кытаанах хонтуруолга ылыахтара. Холуобунай-исполнительнай иниспиэксийэлэр (ХИИ) болдьоҕун иннинэ усулуобунайдык босхоломмут дьону кэтээн көрүөхтэрэ. Ол туһунан 2026 сыл олунньу 11 күнүнээҕи 19-с №-дээх федеральнай сокуон атырдьах ыйын 11 күнүттэн күүһүгэр киирэр.
Болдьоҕун иннинэ босхоломмут байыаннай сулууспалаахтары чаастарын хамандыырдара кэтээн көрүөхтэрэ. Буруйдаммыттар уопсастыбаннай бэрээдэги тутуһуохтаахтар, суут ирдэбиллэрин толоруохтаахтар, ол иһигэр мэдиссиинискэй хааччах миэрэлэрин, ону тэҥэ иниспиэксийэҕэ тиһигин быспакка биллэ туруохтаахтар.
Эбээһинэстэрин толорбот буоллахтарына, холуобунай-испольнительнай иниспиэксийэ эбэтэр байыаннай чаас хамандыыра болдьоҕун иннинэ босхолонууну көтүрэр туһунан суругунан сэрэтии биэриэхтэрин сөп.

Аймаҕа ыарыйдаҕына, уоппуска ылар бырааптаныахтара

Баҕа өттүнэн кыттааччылар уоппусканы РФ Оборуонаҕа министиэристибэтин эбэтэр РФ Росгвардията бигэргэппит быраабылаларынан ылыахтарын сөп. Ол туһунан 2026 сыл от ыйын 26 күнүнээҕи 259-с №-дээх федеральнай сокуон атырдьах ыйын 25 күнүттэн күүһүгэр киирэр.
Холобур, маннык уоппусканы чугас аймахтара ыарыйдахтарына эбэтэр олохтон туораатахтарына биэриэхтэрэ. Маннык түгэҥҥэ эбии уоппуска болдьоҕо 10 суукка буолар. Ону таһынан барарга-кэлэргэ наада буолар бириэмэни учуоттаан, уоппуска уһуна уһатыллыан сөп.

Нолуок төлөммүтүн туһунан биллэрии

Харчы төлүүр туһунан биллэриини нолуок төлөөччү тус кэбиниэтин нөҥүө ФНС саайтыгар эбэтэр судаарыстыбаннай өҥөлөр порталларыгар тиэрдэрэ кыаллыбатах буоллаҕына, почтанан сакаастаан суругунан ыытар кыахтаммыт. Маныаха нолуок туһунан биллэрии докумуонун ФНС ханнык баҕарар салаатыттан эбэтэр Элбэх хайысхалаах киинтэн (МФЦ-тан) илии баттаан ылыахха сөп. Бу 2025 сыл сэтинньи 28 күнүнээҕи 425-с №-дээх федеральнай сокуон нуормаларыгар баар, атырдьах ыйын 1 күнүттэн күүһүгэр киирэр.