Саха Өрөспүүбүлүкэтин Ил Түмэнин аатыттан уонна тус бэйэм Аан дойду дьахталларын күнүнэн – кулун тутар 8 күнүнэн ис сүрэхпиттэн эҕэрдэлиибин!
Аан дойду үрдүнэн тэҥ бырааптаах буолууну туруулаһарга дьахталлар биир санааланыылара устуоруйа кэрэһитэ буолбут сааскы маҥнайгы бырааһынньыгын күнүгэр биһиги саха биллиилээх дьахталларын Нартахова Мария Дмитриевнаны, Сидорова Софья Петровнаны, Овчинникова Александра Яковлевнаны, Горохова Евдокия Николаевнаны, Григорьева Люлия Николаевнаны, Михайлова Евгения Исаевнаны уонна да атыттары киэн тутта ааттыыбыт.
Биһиги төрөөбүт дойдуларын көмүскэлин туһугар эр дьону кытта тэҥҥэ сэрии толоонугар кыргыспыт, сут-кураан дьылларыгар бэйэлэрин харыстаммакка тыылга үлэлээбит, Улуу Кыайыыны уһансыбыт Олоҥхо дойдутун хорсун-хоодуот дьахталларыгар сүһүөхтээх бэйэбит сүгүрүйэбит.
Билиҥҥи сайдыылаах олоххо күн-күбэй ийэлэрбит, тапталлаах кэргэттэрбит, амарах эдьиийдэрбит-балыстарбыт, кэрэчээн кыргыттарбыт кэлэр көлүөнэ инники кэскилин түстээн, олоҕу салҕаан, или-эйэни, доҕордоһууну туругурдан, норуот бигэ туругун бөҕөргөтөн дойдубут, өрөспүүбүлүкэбит аныгы устуоруйатын айаллар-туталлар. Элбэх оҕону төрөппүт ийэлэргэ, тулаайах оҕолору иитэр ийэлэргэ махтал ураты, истиҥ тылларын этиэхпин баҕарабын. Кинилэр сөҕүрээбэт сүрэхтэрин сылааһа, тулхадыйбат тулуурдара, уостубат тапталлара сир үрдүгэр үтүөнү үксэтэр, кэрэни, сырдыгы саҕар.
Саха парламенын бастааҥҥы суолталаах соруктарыттан биирдэстэринэн дьахтар быраабын уонна интэриэһин көмүскээһин, кини идэтин уонна айар дьоҕурун үрдэтии, дьиэ кэргэни, ийэ буолууну уонна оҕо сааһы сокуонунан өйөөһүн буолар. Инникитин даҕаны биһиги кинилэр туруорсар сүрүн боппуруостарын быһаарарга салгыы үлэлиэхпит.
Күндү биһиги кэрэ аҥаардарбыт! Эһиги томороон тымныылаах унньуктаах уһун кыһын кэнниттэн сааскы ылааҥы күн чаҕылхай сардаҥатын кэриэтэ биһиги олохпутун сырдыгынан, сылааһынан толороҕут, саҥа саҕахтары арыйарга, үрдүк чыпчааллары дабайарга күүһү-уоҕу биэрэҕит. Эһиги иэйиилээх тапталгыт, ахсаабат кыһамньыгыт, үтүө өйөбүлгүт уонна дьиэ кэргэни бөҕөргөтүүгэ, норуот үгэстэрин үйэтитиигэ тугунан да кэмнэммэт кылааккыт иһин муҥура суох махтанабыт.
Эһиги ыарахан түгэҥҥэ сөптөөх тылы булар, тускулаах суолу тобулар дьоҕургут биһигини санаабытын көтөҕөр, бэйэҕэ эрэлбитин күүһүрдэр. Ол дьаҥ-дьаһах өрө турбут ураты уустуктардаах ааспыт 2020 сылга арылхайдык көһүннэ.
Быйылгы Доруобуйа сылыгар тус бэйэҕитигэр уонна чугас дьоҥҥутугар чөл уонна бигэ туругу баҕарабын, дьиэ кэргэҥҥитин кыһалҕа-кырыымчык кыһарыйбатын! Куруутун үөрүү-көтүү арыаллаатын, күүстээх таптал угуттаатын, истиҥ сыһыан иилээтин!
-
0
-
0
-
0
-
0
-
0
-
0
