Бэлиитикэ

 Өлүөнэ өрүһү туоруур муостаны тутуу боппуруоһугар кини: “2021 сыл бастакы аҥаарыгар бырайыага оҥоһуллан бүтэн, судаарыстыбаннай экспертизаҕа көрүллүөхтээх. Билиҥҥитэ бырайыагын оҥорон түмүктээн эрэллэр. Чинчийэр, үөрэтэр үлэ барыта оҥоһуллубута. Тутуллуохтаах сиригэр бэлэмнэнии үлэтэ барар, өрүс кытылын бөҕөргөтөллөр, суол оҥоһуллар”, -- диэн хоруйдаата.

Бурдугу үүннэрэр кэтэх хаһаайыстыбаларга туох көмө оҥоһуллуон сөбүн ыйыттылар. Ил Дархан: “Биһиги тыа хаһаайыстыбатын оҥорон таһаарар салаатын сайыннарар соруктаахпыт. Бурдугу үүннэрэр хаһаайыстыбаларга көмөлөһөр, өйүүр сыаллаах тэриллибит “Туймаадаагроснаб” нөҥүө бу киирбит боппуруоһу быһаарыахпыт”, -- диэтэ.

Коронавируска сыһыаннаах ыйытыыга “Кэлиҥҥи үс нэдиэлэ устата көрдөрүү биир таһымҥа турар. Роспотребнадзор, доруобуйа харыстабылын үлэһиттэрэ уонна учуонайдар бэлиэтииллэринэн, өрөспүүбүлүкэҕэ элбэх киһи ыалдьыытын долгуна ааһан эрэр. Ол вируһу утары охсуһууга ылыллыбыт миэрэлэр көдьүүстээхтэрин туоһута, эмтиир эйгэ үлэһиттэрэ  бэриниилээх үлэлэрин түмүгэ», — диэтэ.

Хотуттан аҕалар балыктарын сыаната тоҕо наһаа ыараханын, дьон ол иһин ылан сиэбэтин эттилэр.  “Сөпкө этэҕин, олохтоох бородууксуйа биһиги остуолбутугар баар буолуохтаах. Ол эрээри, сылга 4 эрэ тыһыынча туонна балык бултанар ээ. Онон бу хайысхаҕа кэлим үлэ барыахтаах. Биһиги бэлиитикэбит сүнньэ олохтоох оҥорон таһаарыыны, бэйэ бородууксуйатын элбэтэн, бэйэбит дьоммутун хааччыйыы”.

Үүтү туттарыыга киирэр уларыйыылары туоһуластылар. Айсен Сергеевич : “Саха сиригэр үүтү оҥорон таһаарыыга, сүөһүнү көрүүгэ сыллата 2 миллиард 800 солкуобай көрүллэр. Эһиил сүөһүнү иитиигэ барыта 4 миллиард солкуобай көрүллүөҕэ, ол эбэтэр дотация 40%-нан эбиллиэҕэ. Кэтэх хаһаайыстыбалаах дьон сүөһү төбөтүгэр 35 тыһыынча солкуобайы ылыахтара, бөдөҥ хаһаайыстыбаларга үүт субсидията киилэтигэр 60 солкуобайга диэри улаатыаҕа”, -- диэн хоруйдаата.