Санаттахха, аан бастакы тыа сирин туризмын туһунан сокуон барыла 2019 сыллаахха оҥоһуллубут. Бу докумуоҥҥа РФ Бырабыыталыстыбата үгүс көннөрүүлэри киллэрбит. Онон, бу ааспыт сыллар устата, ааптардар сокуону көннөрүүгэ үлэлэстилэр.
Докумуоҥҥа этиллэринэн, тыа сирин туризмын өйдөбүлүгэр култуурунай, этнографическай, гастрономическай, аграрнай уо.д.а. туризм хайысхалара киирэллэр. Маннык хабааннаах туризм 30-50 тыһ. нэһилиэнньэлээх аччыгый куораттарга сайдар кыахтааҕа сабаҕаланар. Арассыыйаҕа итиччэ нэһилиэнньэлээх 800 кэриҥэ куорат баара биллэр, ол иһигэр дьоҥҥо-сэргэҕэ номнуо киэҥник биллэр туристыыр кииннэр Суздаль, Углич, Таруса уо.д.а. киирэллэр.
Дьобуруопаҕа тыа сирин туризма бэйэтин сайдыытынан иккис миэстэҕэ турар. Францияҕа, Улуу Британияҕа, Нидерландыга, Ирландияҕа, Германияҕа, Испанияҕа тыа сирин туризмын судаарыстыбаннай таһымҥа өйүүллэр уонна тыа сирин биир кэлим сайдыытын бырагыраамаларыгар булгуччу киллэрэллэр.
Өскөтүн саҥа сокуон олоххо киирдэҕинэ, эрэгийиэннээҕи былаастарга тыа сирин туризмын сайыннаралларыгар тустаах боломуочуйалар бэриллиэхтэрэ. Ону олохтоох бэйэни салайыныы уорганнара миэстэтигэр олоххо киллэриэхтэрэ. Бу сокуон тыа сирин сайдыытыгар сүҥкэн оруолу ылар чинчилээх.
Ааптардар тыа сирин туризмын алын сүһүөҕүнэн агротуризмы араараллар. Агротуризм өйдөбүлүгэр тыа хаһаайыстыбатын тэрилтэлэрин көрүүнү-истиини уонна үлэлэргэ быһаччы кыттыыны киллэрэллэр. Агротуризм ирдэбиллэрин РФ Бырабыыталыстыбата олохтуура былааннанар.
Саҥа сокуон барылын сүнньүнэн Ил Түмэн Судаарыстыбаннай Мунньаҕын тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин бэйэтин санаатын үллэһиннэ:
– Агротуризм туһунан Арассыыйа парламенын таһымыгар сокуон барыла оҥоһуллубутун биһириибин эрэ. Туох да диэбит иһин, биһиги эрэгийиэммит сүрүннээн тыа хаһаайыстыбатынан дьарыктанар.
Агротуризм бэрт кыра “араскылара” биһиэхэ да бааллар, олох суох буолбатахтар. Биир бэйэм итинэн дьарыктанар аҕыйах урбаанньыты кытта билэбин. Оннооҕор куораттан тахсан тыа сирин олоҕун саҥа билэ-көрө сылдьар ыччаттар элбэхтэр. Билсэн баран, олус диэн астыналлар, анаан-минээн сайылыы да тахсыахтарын баҕараллар. Оттон ити хайысха сокуонунан бигэргэннэҕинэ, урбаанньыттарга көмө оҥоһулуннаҕына, туох куһаҕана кэлиэй?! Тыа хаһаайыстыбатын курдук уустук үлэнэн дьарыктана сылдьааччыларга эбии дохуот буолуо этэ дии саныыбын.
“Парламентская газета” матырыйаалынан.
СИА хаартыската.
-
0
-
0
-
0
-
0
-
0
-
0
