— Ытыктабыллаах Сахабыт сирин дьоно-сэргэтэ уонна олохтоохторо! Коронавирус дьаҥа туран, суһал балаһыанньаҕа олорбуппут сэттис ыйа үүннэ. Саас хааччахтааһын эрэсиимин кытаанахтык тутуһаммыт, коронавирус дьаҥын тарҕаныыта аччаан барбыта. Ол түмүгүнэн сайын сорох миэрэлэр уһуллубуттара. Ол гынан баран, күһүөрү коронавирус иккис долгуна кэллэ, – диэтэ.
– Бу күннэргэ ыалдьыбыт дьон уопсай ахсааныттан 70 % Дьокуускай куоракка тиксэр. Онон балаһыанньа уустугурда. Улуустарга, бэл диэтэр, чиэски нэһилиэктэргэ ыарыы тиийдэ. Дьон кэлин санитарнай ирдэбиллэри тутуспат буолла, мааска кэппэккэ сылдьар дьон элбээтэ, маассабай тэрээһиннэргэ үгүстүк мустар буоллулар. Ким да хааччахтанан олоруон баҕарбат, – диэн бэлиэтээтэ.
Ил Дархан санитарнай ирдэбили кэспит тэрилтэ тута сабылларын туһунан санатта. Мэдиссиинискэй маасканы кэтии уонна элбэх киһи тоҕуоруһар сириттэн, дьонтон тэйиччи сылдьыы ыарыы тарҕаныытыттан син биир көмүскүүрүн бэлиэтээтэ.
Дьону эппиэтинэстээх буоларга, уопсай балаһыанньаны өйдөөн ылыналларыгар ыҥырда. Билигин быраастар 40% коронавируһу утары үлэлии сылдьалларын бэлиэтээтэ. Атын ыарыылар эмиэ баалларын, быраастар биир да күн сынньалаҥа суох үлэлии сылдьалларын эттэ. Иккис долгун кэлбитинэн, эбии инфекционнай куойкалар арыллыбыттарын, 70% номнуо толорутун иһитиннэрдэ. Салгыы маннык бардаҕына, балаһыанньа өссө уустугуруо диэн сэрэттэ.
Дьаҥ-дьаһах тарҕаныыта хас биирдии киһи төһө эппиэтинэстээҕиттэн тутулуктааҕын тоһоҕолоон эттэ. Үөрэх чааһыгар, билигин хас биирдии оскуола, оҕо саада хонтуруолга сылдьарын, ханнык эмэ оскуолаҕа ыалдьыбыт оҕо көһүннэ да, ол оскуола дистанционнай үөрэххэ көһүөҕэ диэтэ. Кини тэрилтэлэр салайааччыларын, чуолаан, улуус уонна нэһилиэк баһылыктара эппиэтинэстээх буолалларыгар санатта. Иккис долгуну этэҥҥэ аһарар туһуттан, бары эппиэтинэһи ылынан өйөһөргө уонна аҕам саастаахтарбытын харыстыырга, ирдэбили тутуһарга ыҥырда.
-
0
-
0
-
0
-
0
-
0
-
0
